ഇന്ത്യൻ റെയിൽവേയുടെ അഭിമാനമായ വന്ദേ ഭാരത് എക്സ്പ്രസ് ട്രെയിനുകൾ യാഥാർത്ഥ്യമാകുന്ന ചെന്നൈയിലെ ഇന്റഗ്രൽ കോച്ച് ഫാക്ടറിക്കുള്ളിലെ (ICF) അപൂർവ്വ ദൃശ്യങ്ങൾ സോഷ്യൽ മീഡിയയിൽ വൈറലാകുന്നു. അത്യാധുനിക സൗകര്യങ്ങളോടെ മിന്നിപ്പായുന്ന വന്ദേ ഭാരത് കോച്ചുകൾ ഓരോന്നും എത്രത്തോളം സൂക്ഷ്മമായ എഞ്ചിനീയറിംഗ് മികവോടെയാണ് നിർമ്മിക്കുന്നതെന്ന് വ്യക്തമാക്കുന്നതാണ് ഈ വീഡിയോ. ട്രാവൽ കണ്ടന്റ് ക്രിയേറ്ററായ കരണ് ആണ് തന്റെ ഇൻസ്റ്റാഗ്രാം പേജിലൂടെ വന്ദേ ഭാരതിന്റെ അണിയറക്കാഴ്ചകൾ പുറത്തുവിട്ടത്. ഇന്ത്യൻ റെയിൽവേയുടെ ആധുനികവൽക്കരണത്തിന്റെ പ്രതീകമായ ഈ സെമി ഹൈസ്പീഡ് ട്രെയിനുകളുടെ നിർമ്മാണ പ്രക്രിയ കണ്ട് അമ്പരന്നിരിക്കുകയാണ് സോഷ്യൽ മീഡിയ.
നിർമ്മാണത്തിന്റെ വിവിധ ഘട്ടങ്ങളിലൂടെ കടന്നുപോകുന്ന കോച്ചുകളെ വീഡിയോയിൽ കാണാം. ട്രെയിനിന്റെ ഉള്ളിലെ സീറ്റുകളും ഫ്ലോറിംഗും ഫിറ്റിംഗുകളും സ്ഥാപിക്കുന്നതിന് മുൻപുള്ള വെറും ലോഹക്കൂട് മാത്രമായ അവസ്ഥയിൽ നിന്നാണ് നിർമ്മാണം തുടങ്ങുന്നത്. റെയിൽവേ പാളത്തിന് മുകളിലായി നിർത്തിയിട്ടിരിക്കുന്ന വലിയ വർക്ക്ഷോപ്പിൽ കോച്ചിന്റെ അടിഭാഗത്തായി ഇരുന്ന് മെക്കാനിക്കൽ ഭാഗങ്ങൾ അതിസൂക്ഷ്മമായി ഘടിപ്പിക്കുന്ന ജീവനക്കാരന്റെ ദൃശ്യങ്ങൾ നിർമ്മാണത്തിലെ കൃത്യത വെളിപ്പെടുത്തുന്നു. ഓരോ ബോൾട്ടും സ്ക്രൂവും മുറുക്കുന്നത് മുതൽ സങ്കീർണ്ണമായ വയറിംഗും ബോഡി വർക്കുകളും പൂർത്തിയാക്കുന്നത് വരെയുള്ള നീണ്ട പ്രക്രിയയാണ് ഓരോ വന്ദേ ഭാരത് ട്രെയിനിന് പിന്നിലുമുള്ളതെന്ന് ഈ വീഡിയോ ഓർമ്മിപ്പിക്കുന്നു.
“ഇന്ത്യൻ കരുത്തന്മാർ ജനിക്കുന്ന ഇടം” എന്ന അടിക്കുറിപ്പോടെ പങ്കുവെച്ച വീഡിയോ ഇതിനകം ലക്ഷക്കണക്കിന് ആളുകളാണ് കണ്ടത്. വായുഗതിക് (Aerodynamic) നിയന്ത്രിക്കാൻ സഹായിക്കുന്ന രീതിയിലുള്ള മുൻഭാഗത്തെ രൂപകൽപ്പനയും യാത്രക്കാർക്ക് കൂടുതൽ കംഫർട്ട് നൽകുന്ന ഇന്റീരിയറും വന്ദേ ഭാരതിന്റെ പ്രത്യേകതയാണ്. ആഗോള നിലവാരത്തിലുള്ള സാങ്കേതിക വിദ്യ ഉപയോഗിച്ച് തദ്ദേശീയമായി നിർമ്മിക്കുന്ന ഈ ട്രെയിനുകൾ ഇന്ത്യൻ റെയിൽവേയുടെ മുഖച്ഛായ തന്നെ മാറ്റിമറിച്ചു. നിലവിൽ രാജ്യത്തെ പ്രധാന നഗരങ്ങളെ ബന്ധിപ്പിച്ച് ഓടിക്കൊണ്ടിരിക്കുന്ന വന്ദേ ഭാരത് ട്രെയിനുകളുടെ എണ്ണം വർദ്ധിപ്പിക്കുന്നതിന്റെ ഭാഗമായി ചെന്നൈ ഐസിഎഫിൽ യുദ്ധകാലാടിസ്ഥാനത്തിലാണ് നിർമ്മാണ പ്രവർത്തനങ്ങൾ നടക്കുന്നത്. റെയിൽവേയുടെ ഈ വളർച്ചാ വേഗതയെ അഭിനന്ദിച്ചുകൊണ്ട് നിരവധി പേരാണ് വീഡിയോയ്ക്ക് താഴെ കമന്റുകളുമായെത്തുന്നത്.
