ലോകത്തെ ഏറ്റവും ജനസംഖ്യാ വളര്‍ച്ചയുള്ള നഗരമായി മലപ്പുറം: പട്ടികയിലെ ആദ്യപത്തില്‍ ഇടംപിടിച്ചത് കേരളത്തില്‍ നിന്നുള്ള മൂന്ന് നഗരങ്ങള്‍,അസൂയയുളവാക്കുന്ന വളര്‍ച്ചയായി ചിത്രീകരിച്ച് മനോരമ

ലോകത്തെ ഏറ്റവും ജനസംഖ്യ പെരുപ്പമുള്ള നഗരമായി ദി ഇക്കണോമിസ്റ്റ് മാഗസിന്റെ ഭാഗമായ ഇക്കണോമിസ്റ്റ് ഇന്റലിജന്‍സ് യൂണിറ്റ് (ഇഐയു) നടത്തിയ സര്‍വേ തെരഞ്ഞെടുത്തത് കേരളത്തിലെ മലപ്പുറം ജില്ലയെ. 44 ശതമാനമാണ് മലപ്പുറത്തിന്റെ ജനസംഖ്യാ വളര്‍ച്ച. പട്ടികയിലെ പത്ത് സ്ഥാനങ്ങളില്‍ കേരളത്തില്‍ നിന്നുള്ള മൂന്ന് നഗരങ്ങളാണ് ഇടംപിടിച്ചത്. കേരളത്തിലെ കോഴിക്കോട്( 35 ശതമാനം) നാലാം സ്ഥാനത്തും, കൊല്ലം ( 31 ശതമാനം) പത്താം സ്ഥാനത്തും ഇടംപിടിച്ചു. കേരളത്തിലെ തൃശ്ശൂരാണ് 13ാം സ്ഥാനത്ത്.

പട്ടികയില്‍ രണ്ടാം സ്ഥാനത്തുള്ളത് വിയറ്റനാമിലെ കാന്‍ തോ ആണ്. 37 ശതമാനമാണ് ഇവിടുത്തെ ജനസംഖ്യാവളര്‍ച്ചയെന്നും റിപ്പോര്‍ട്ട് ചൂണ്ടിക്കാട്ടുന്നു. 2015 ലും 2020ലും വലിയ വളര്‍ച്ചയാണ് ഈ നഗരങ്ങളിലുണ്ടായതെന്ന് യുഎന്‍ റിപ്പോര്‍ട്ടിന്റെ അടിസ്ഥാനത്തിലുള്ള സര്‍വ്വേ വ്യക്തമാക്കുന്നു.

ചൈനയിലെ സുഖ്‌യാന്‍ (36.6), സുഷോവു (32.5), പുറ്റിയാന്‍ (32.2), നൈജീരിയയിലെ അബുജ (34.2), യുഎഇയിലെ ഷാര്‍ജ (32.2), ഒമാനിലെ മസ്‌കത്ത് (31.4) എന്നിവയാണ് ആദ്യ പത്തില്‍ ഇടം പിടിച്ചവ. ഗുജറാത്തിലെ സൂറത്ത് 26ാം സ്ഥാനത്തും തമിഴ്‌നാട്ടിലെ തിരുപ്പൂര്‍ 30ാം സ്ഥാനത്തുമുണ്ട്.

അതേസമയം മലപ്പുറം ഉള്‍പ്പടെ മൂന്ന് നഗരങ്ങള്‍ പട്ടികയില്‍ ഇടംപിടിച്ചത് അസുയയുളവാക്കുന്ന വളര്‍ച്ചയാണെന്ന് മലയാള മനോരമ റിപ്പോര്‍ട്ട് ചെയ്തതിനെതിരെ പ്രതിഷേധം ഉയര്‍ന്നു. കേരളത്തിന് അഭിമാനകരമായ വളര്‍ച്ച എന്നാണ് മനോരമ തെറ്റായി റിപ്പോര്‍ട്ട് ചെയ്തത്. അനിയന്ത്രിതമായ ജനസംഖ്യാ വളര്‍ച്ച ലോകം ആശങ്കയോടെ വീക്ഷിക്കുമ്പോഴാണ് റിപ്പോര്‍ട്ട് നേട്ടമായി മനോരമ ആഘോഷമാക്കിയത്.
ജനസംഖ്യവളര്‍ച്ച മനോരമയ്ക്ക് നേട്ടമായി തോന്നുന്നത് യാദൃച്ഛീകമാവാന്‍ വഴിയില്ല എന്നാണ് വിമര്‍ശനം വലിയ പ്രതിഷേധമാണ് ഇതിനെതിരെ നവമാധ്യമങ്ങളില്‍ ഉയരുന്നത്.