തമിഴ്നാട്ടില് ചെന്നൈയിലെ 48 കടലാസ് കമ്പനികള്ക്കെതിരേ നിയമനടപടികളുമായി സി ബി ഐ. 201415 കാലഘട്ടത്തില് ആയിരത്തിമുപ്പത്തിയെട്ട് കോടി രൂപയുടെ കള്ളപ്പണം തമിഴ്നാട്ടില് നിന്ന് ഹോങ്ങ്കോങ്ങിലേക്ക് കടത്തിയതിനാണ് സി ബി ഐ നിയമനടപടികളുമായി മുന്നോട്ടുപോകുന്നത്.
മുഹമ്മദ് ഇബ്റാംസ ജോണി, സിന്ഡ മിധര്, നിസാമുദ്ദീന് എന്നീ പേരുകാരേയും സി ബി ഐ കേസില് ഉള്പ്പെടുത്തിയിട്ടുണ്ട്. ഇതില് മുഹമ്മദ് ഇബ്റാംസ ജോണി ശിവഗംഗക്കാരനാണ്. ഈ പ്രദേശത്തു നിന്നുള്ള ഒരു ഉന്നത നേതാവിന്റെ ബിനാമി ഇടപാടുകാരാണ് ഇവരെന്നാണ് ദേശീയമാധ്യമങ്ങള് റിപ്പോര്ട്ട് ചെയ്യുന്നത്. സമാനമായ വിവിധ കേസുകളില് എന്ഫോഴ്സ്മെന്റ് ഡയറക്ട്രേറ്റിന്റേയും സി ബി ഐയുടേയും നിയമനടപടികള് നേരിടുന്നയാളാണ് മുന് യുപിഎ സര്ക്കാരില് വന് സ്ഥാനമുണ്ടായിരുന്ന ഈ നേതാവും.
ബാങ്ക് ഓഫ് ഇന്ത്യ, പഞ്ചാബ് നാഷണല് ബാങ്ക്, സ്റ്റേറ്റ് ബാങ്ക് ഓഫ് മൈസൂര് (ഇപ്പോള് സ്റ്റേറ്റ് ബാങ്ക് ഓഫ് ഇന്ത്യ) എന്നീ ബാങ്കുകളിലൂടെയാണ് കള്ളപ്പണം കടത്തിയതെന്നാണ് സി ബി ഐ പ്രഥമവിവരറിപ്പോര്ട്ടിലുള്ളതെന്ന് ദേശീയമാദ്ധ്യമങ്ങള് പുറത്തുവിട്ട വിവരത്തില് പറയുന്നു. ഇതിനായി ഇവരെ സഹായിച്ച ഈ ബാങ്കുകളിലെ ഉദ്യോഗസ്ഥരേയും അറസ്റ്റ് ചെയ്യാനാണ് സി ബി ഐ നീ!ക്കം. സിബിഐ ബാംഗ്ലൂര് യൂണിറ്റാണ് പ്രഥമവിവരറിപ്പോര്ട്ട് തയ്യാറാക്കിയിരിയ്ക്കുന്നത്.
ഈ കമ്പനികളിലൂടെ വിവിധ സാധനങ്ങള് ഇറക്കുമതി ചെയ്യുകയും അതിന്റെ വില എന്ന നിലയില് വന് തുക വിദേശത്തേക്ക് അയയ്ക്കുകയുമായിരുന്നു ചെയ്തിരുന്നതെന്ന് സി ബി ഐ പറയുന്നു. ഇറക്കുമതി ചെയ്ത ചരക്കുകളുടെ വിലയേക്കാള് നൂറുകണക്കിനിരട്ടി പണമാണ് വിദേശത്തേക്കയച്ചത്. ഇത് കള്ളപ്പണം കടത്താന് തന്നെയാണെന്ന് വ്യക്തമായ തെളിവുകള് ലഭിച്ചിട്ടുണ്ടെന്നും 20142015 സമയത്ത് മാറിവന്ന രാഷ്ട്രീയസാഹചര്യങ്ങള് കാരണം രക്ഷയില്ലെന്ന് കണ്ടപ്പോള് പൂഴ്ത്തിവച്ചിരുന്ന അഴിമതിപ്പണം കടത്തുകയായിരുന്നു ഇവര് എന്നുമാണ് സിബിഐ കണ്ടെത്തല്.
ഇതിലെ പല കമ്പനികളുടെയും വാര്ഷിക വരവ് ലക്ഷങ്ങള് മാത്രമേ കാണിച്ചിരുന്നുള്ളെങ്കിലും വിദേശത്തേക്ക് നൂറുകണക്കിനു കോടിയാണ് അയച്ചുകൊടുത്തത്. ബാങ്ക് ഉദ്യോഗസ്ഥരുടെ ഇടപെടലും അറിവുമില്ലാതെ ഇത് ചെയ്യാനാകില്ലെന്നും വിശദമായ അന്വേഷണം നടത്തി ഇതിനു പിറകിലുള്ളവരേയും ഇതില് ഗൂഢാലോചന ചെയ്തവരേയും നിയമത്തിനു മുന്നിലെത്തിയ്ക്കുമെന്നും സിബിഐ വൃത്തങ്ങള് പറഞ്ഞു.
Discussion about this post