മൈസൂരൂ: ക്യാമ്പസിനുള്ളില്‍ ‘ഫ്രീ കശ്മീര്’ പോസ്റ്ററുകള് പ്രത്യക്ഷപ്പെട്ടതിനെത്തുടര്‍ന്ന്‌ പോലീസില്‍ പരാതി നല്‍കി മൈസൂര്‍ സര്‍വകലാശാലാ അധികൃതര്‍. അടുത്തിടെ ജെ.എന്‍.യുവിലുണ്ടായ അക്രമങ്ങള്‍ക്കെതിരേ നടന്ന പ്രതിഷേധത്തിനിടെയാണു പോസ്റ്ററുകള് പ്രത്യക്ഷപ്പെട്ടത്‌. നേരത്തെ പൗരത്വ ഭേദഗതി ബില്‍ പ്രതിഷേധത്തിനിടെ ഡല്‍ഹിയിലും ഇത്തരം പോസ്റ്ററുകള് പ്രത്യക്ഷപ്പെട്ടിരുന്നു. സംഭവത്തെക്കുറിച്ച്‌ വിശദീകരണം ആവശ്യപ്പെട്ട് സര്‍വകലാശാലാ അധികൃതര്‍ ബന്ധപ്പെട്ട വിദ്യാര്‍ഥി സംഘടനയ്‌ക്കും നോട്ടീസ് നല്കിയിട്ടുണ്ട്.
പോസ്റ്റര് വിവാദത്തില്‍ പോലീസ് രാജ്യദ്രോഹക്കുറ്റത്തിനു കേസ് രജിസ്‌റ്റര്‍ ചെയ്തു. ജനുവരി എട്ടിന്, മൈസൂര്‍ സര്‍വകലാശാലയിലെ ചില വിദ്യാര്‍ത്ഥി യൂണിയനുകള്‍ ജെഎന്‍യു വിദ്യാര്‍ത്ഥികളെ ആക്രമിച്ചതില്‍ പ്രതിഷേധിച്ച്‌ നടന്ന പ്രതിഷേധത്തിലാണ് പ്രാദേശിക മാധ്യമങ്ങള്‍ ‘ഫ്രീ കശ്മീര്’ എന്ന് പറയുന്ന ഒരു പോസ്റ്റര് എടുത്തുകാട്ടി റിപ്പോര്‍ട്ട് ചെയ്തത്. ഇത് ശ്രദ്ധയില്‍പ്പെട്ട പോലീസ് വിവാദ പോസ്റ്റര് കൈവശം വച്ചിരുന്ന യൂണിവേഴ്‌സിറ്റിയിലെ പൂര്‍വ്വ വിദ്യാര്‍ത്ഥിയായ യുവതിക്കെതിരെ സ്വമേധയാ രാജ്യദ്രോഹക്കുറ്റം ചുമത്തുകയായിരുന്നു.
തമിഴ്‌നാട് സ്വദേശിയും നിലവില്‍ നഗരത്തിലെ രാമകൃഷ്ണനഗറില്‍ താമസിക്കുന്ന നളിനി ബാലകുമാറെന്ന മുന്‍ വിദ്യാര്‍ത്ഥിനിയെ ജയലക്ഷ്മിപുരം പോലീസ് ചോദ്യം ചെയ്യലിനായി വിളിപ്പിച്ചു. ഒരു വനിതാ കോണ്‍സ്റ്റബിളിനെ നളിനിയുടെ വീട്ടിലേക്ക് അയച്ചതായും പോലീസിന് മുന്നില്‍ ഹാജരാകാന്‍ ആവശ്യപ്പെടുന്ന നോട്ടീസ് അവളുടെ വീടിന്റെ പൂട്ടിയിട്ട വാതിലുകളില്‍ ഒട്ടിച്ചതായും പോലീസ് പറഞ്ഞു.
മൈസൂര്‍ യൂണിവേഴ്സിറ്റി റിസര്‍ച്ച്‌ സ്‌കോളേഴ്‌സ് അസോസിയേഷന്‍, ബഹുജന വിദ്യാര്‍ത്ഥി സംഘ, സ്റ്റുഡന്റ്‌സ് ഫെഡറേഷന്‍ ഓഫ് ഇന്ത്യ, ഓള്‍ ഇന്ത്യ ഡെമോക്രാറ്റിക് വിദ്യാര്‍ത്ഥികളുടെ സംഘടന തുടങ്ങിയവരായിരുന്നു പ്രതിഷേധം സംഘടിപ്പിച്ചത്.യൂണിവേഴ്സിറ്റി കാമ്ബസിനുള്ളില്‍ കത്തിച്ച ടോര്‍ച്ചുകളും മുദ്രാവാക്യങ്ങളും മുഴക്കി വിദ്യാര്‍ത്ഥികള്‍ പ്രതിഷേധ മാര്‍ച്ച്‌ നടത്തി. പ്രധാന കവാടത്തിനടുത്തുള്ള കുവേമ്ബു പ്രതിമയിലേക്ക് പ്രതിഷേധക്കാര്‍ കയറി. തുടര്‍ന്ന് ഇവിടെ വെച്ച്‌ ജെഎന്‍യുവില്‍ അഴിച്ചുവിട്ട അക്രമത്തിനെതിരെ മുദ്രാവാക്യം വിളിക്കാന്‍ തുടങ്ങി.
വെളുത്ത നിറത്തില്‍ എഴുതിയ ‘ഫ്രീ കശ്മീര്’ എന്ന ഒരു ചെറിയ പോസ്റ്റര് കറുത്ത നിറത്തില്‍ പിടിച്ചിരിക്കുന്നതായി വീഡിയോകള്‍ കാണിക്കുകയും ഈ വീഡിയോകള്‍ സോഷ്യല്‍ മീഡിയയില്‍ വ്യാപകമായി പങ്കിടുകയും ചെയ്തു. ഇതിനെ തുടര്‍ന്നാണ് പോലീസ് കേസ് എടുത്തത്. പ്രകടനവും സംഘര്‍ഷവും നിയമവിരുദ്ധമായി സംഘടിപ്പിച്ചതിന് നിയമനടപടി ആവശ്യപ്പെട്ട് യൂണിവേഴ്സിറ്റി രജിസ്ട്രാര്‍ പ്രൊഫ. ആര്‍. ശിവപ്പയും പ്രകടന സംഘാടകര്‍ക്കെതിരെ ജയലക്ഷ്മിപുരം പോലീസിന് പരാതി നല്കിയിട്ടുണ്ട്.
കൂടാതെ സംഭവത്തില്‍ യു‌എം ചാന്‍സലര്‍ കൂടിയായ ഗവര്‍ണര്‍ വാജുഭായ് വാല സര്‍വകലാശാല അധികൃതരില്‍ നിന്ന് റിപ്പോര്‍ട്ട് തേടിയിട്ടുണ്ട്. ഗവര്‍ണറുടെ നിര്‍ദേശത്തെത്തുടര്‍ന്ന് രജിസ്ട്രാര്‍ പ്രൊഫ. ശിവപ്പ ഇന്നലെ രാത്രി ഗവര്‍ണര്‍ക്ക് റിപ്പോര്‍ട്ട് നല്‍കിയതായി വൃത്തങ്ങള്‍ അറിയിച്ചു.
Discussion about this post