മുംബൈ: മുംബൈയിലെ കടകള്, മാളുകള്, ഭക്ഷണശാലകള് സിനിമാ തീയേറ്ററുകള് എന്നിവ 24 മണിക്കൂറും തുറന്നു പ്രവര്ത്തിക്കുന്നത് ഇന്ത്യന് സംസ്കാരത്തിന്റെ ഭാഗമല്ലെന്ന് ബിജെപി നേതാവ് രാജ് പുരോഹിത്. പാര്പ്പിടമേഖലകളിലല്ലാത്ത മാളുകള്, തീയേറ്ററുകള് എന്നിവ പരീക്ഷണാടിസ്ഥാനത്തില് 24 മണിക്കൂറും തുറന്നു പ്രവര്ത്തിക്കാന് സര്ക്കാര് അനുമതി നല്കിയതിന് പിന്നാലെയാണ് നടപടിയോട് എതിര്പ്പ് അറിയിച്ച് രാജ് പുരോഹിത് രംഗത്തെത്തിയത്.
മുംബൈയിലെ രാത്രി ജീവിതത്തെ കഴിഞ്ഞ അഞ്ചുവര്ഷമായി എതിര്ത്തു കൊണ്ടിരിക്കുന്നയാളാണ് ഞാന്. ഇത് ഇന്ത്യന് സംസ്കാരത്തിന്റെ ഭാഗമല്ല. ഇത് യുവാക്കളെ തെറ്റായ വഴിയിലേക്ക് നയിക്കും. കൂടാതെ ഇത് ബലാത്സംഗക്കേസുകളുടെ എണ്ണത്തിലും സ്ത്രീകള്ക്കെതിരെയുള്ള ആക്രമണങ്ങളിലും വര്ധനയുണ്ടാക്കുമെന്നും രാജ് പുരോഹിത് വാര്ത്താ ഏജന്സിയായ എഎന്ഐയോടു പറഞ്ഞു.
മദ്യ സംസ്കാരം കൂടുതല് ജനപ്രിയമായാല്, ഇത് സ്ത്രീകള്ക്കെതിരെയുള്ള ആക്രമണങ്ങള് വര്ധിക്കാന് ഇടയാക്കും. ആയിരക്കണക്കിന് നിര്ഭയ കേസുകള് ഉണ്ടാകും. ഇത്തരം സംസ്കാരങ്ങള് ഇന്ത്യക്ക് നല്ലതാണോയെന്ന് ഉദ്ധവ് താക്കറേ ചിന്തിക്കണമെന്നും രാജ് പുരോഹിത് കൂട്ടിച്ചേര്ത്തു.
Discussion about this post