തിരുവാഭരണത്തില് പന്തളം രാജകുടുംബത്തിന് എന്ത് അവകാശമെന്ന ചോദ്യമുയര്ത്തി സുപ്രിം കോടതി. തിരുവാഭരണം ദൈവത്തിന് സമര്പ്പിച്ചതല്ലേ എന്നും കോടതി ചോദിച്ചു. ശബരിമലയില് അയ്യപ്പന് ചാര്ത്തുന്ന തിരുവാഭരണത്തില് രാജകുടുംബത്തിലെ രണ്ട് വിഭാഗക്കാര് അവകാശം ഉന്നയിച്ചിരുന്നു. ഈ കേസിലാണ് തിരുവാഭരണത്തില് രാജകുടുംബത്തിന് അവകാശമില്ല എന്ന തരത്തിലുള്ള പരാമര്ശം കോടതിയുടെ ഭാഗത്ത് നിന്നുണ്ടായത്.
ശബരിമലയില് പ്രത്യേക നിയമം തയ്യാറാക്കാന് കൂടുതല് സമയം വേണമെന്ന് സംസ്ഥാന സര്ക്കാര് കോടതിയില് ആവശ്യപ്പെട്ടു. നാലാഴ്ചത്തെ സമയമാണ് സര്ക്കാര് ആവശ്യപ്പെട്ടത്.
ശബരിമല ഭരണ നിര്വ്വഹണത്തിന് പ്രത്യേക നിയമം വേണമെന്ന് സുപ്രീം കോടതി നേരത്തെ സംസ്ഥാന സര്ക്കാരിനോട് ആവശ്യപ്പെട്ടിരുന്നു. ബില്ലിന്റെ കരട് കോടതിയില് സമര്പ്പിക്കാനും കോടതി നിര്ദ്ദേശം നല്കിയിരുന്നു. ഗുരുവായൂര് തിരുപ്പതി മാതൃകയില് എന്തുകൊണ്ട് പ്രത്യേക നിയമം ആയിക്കൂടെന്ന് വീണ്ടും കോടതി ചോദിക്കുകയും ചെയ്തു.
ഈ കേസ് പരിഗണിക്കുന്നതിന്റെ പ്രധാന ലക്ഷ്യം പ്രത്യേക നിയമം തന്നെയാണെന്ന് കോടതി പറഞ്ഞു. ഇതിനായി മൂന്നുമാസത്തെ സമയം നല്കുന്നുവെന്നും, ബില്ലിന്റെ കരട് ഒരു മാസത്തിനകം ഹാജരാക്കണമെന്നും കോടതി ആവശ്യപ്പെട്ടു. ഡിസംബറിലും ജനുവരിയിലുമൊക്കെ ഉത്സവകാലമാണെന്ന് പറഞ്ഞ്, സര്ക്കാര് കൂടുതല് സമയം ആവശ്യപ്പെട്ടു. ഉത്സവവും നിയമം ഉണ്ടാക്കുന്നതും തമ്മില് എന്താണ് ബന്ധമെന്നായി സുപ്രീം കോടതിയുടെ അടുത്ത ചോദ്യം. കേരളം പോലുള്ള ഒരു സംസ്ഥാനത്ത് കോടതിയുടെ ഇടപെടല് ഉണ്ടായാലേ നിയമം കൊണ്ടുവരാനാകൂ എന്ന് ചോദിച്ച കോടതി കേസ് പരിഗണിക്കുന്നത് ഇന്നത്തേക്ക് മാറ്റുകയായിരുന്നു.
തിരുവിതാംകൂര് ദേവസ്വം ബോര്ഡിന് കീഴിലുള്ള എല്ലാ ക്ഷേത്രങ്ങളിലെയും ഭരണ നിര്വ്വഹണത്തിനായി പ്രത്യേക ബോര്ഡ് രൂപീകരിക്കാന് നേരത്തെ സംസ്ഥാന സര്ക്കാര് തീരുമാനിച്ചിരുന്നു. ഇതിനെ ചോദ്യം ചെയ്തുകൊണ്ട് പന്തളം രാജകുടുംബം സമര്പ്പിച്ച ഹര്ജിയില് ജസ്റ്റിസ് എന്വി രമണ അധ്യക്ഷനായ ബെഞ്ചാണ് വാദം കേട്ടത്. ശബരിമലയില് വര്ഷത്തില് 50 ലക്ഷത്തോളം തീര്ത്ഥാടകര് വരുന്നുണ്ടെന്നും അതുകൊണ്ട് മറ്റ് ക്ഷേത്രങ്ങളുമായി താരതമ്യം ചെയ്യുന്നത് എങ്ങിനെയാണെന്നും കോടതി ചോദിച്ചു. ശബരിമലയ്ക്ക് വേണ്ടി മാത്രമായി ഒരു നിയമം കൊണ്ടുവരുന്നതിന് എന്താണ് തടസമെന്ന ചോദ്യവും സുപ്രീം കോടതിയില് നിന്നുണ്ടായി. ശബരിമലയ്ക്ക് അത്തരമൊരു നിയമം കൊണ്ടുവരേണ്ട സാഹചര്യം ഉണ്ടെന്നും കോടതി വ്യക്തമാക്കിയിരുന്നു.
Discussion about this post