ബംഗലൂരു: പുൽവാമ ഭീകരാക്രമണം നടന്ന് ഒരു വർഷം പിന്നിടുന്ന വേളയിൽ പാക് അനുകൂല മുദ്രാവാക്യം മുഴക്കിയ മൂന്ന് കശ്മീരി വിദ്യാർത്ഥികൾ കർണ്ണാടകയിൽ അറസ്റ്റിലായി. കെ എൽ ഇ സർവ്വകലാശാലയിലെ വിദ്യാർത്ഥികളാണ് പിടിയിലായിരിക്കുന്നത്. ഇവർ പാക് അനുകൂല മുദ്രാവാക്യങ്ങൾ മുഴക്കുന്ന ദൃശ്യങ്ങൾ സാമൂഹിക മാദ്ധ്യമങ്ങളിലൂടെ പ്രചരിച്ചതോടെയാണ് അറസ്റ്റ് ചെയ്തതെന്ന് ഹൂബ്ലി- ധർവാദ് പൊലീസ് കമ്മീഷണർ അറിയിച്ചു.
വീഡിയോ പ്രചരിച്ചതിനെ തുടർന്ന് ഇവരെ അറസ്റ്റ് ചെയ്യണമെന്ന് ആവശ്യപ്പെട്ട് എബിവിപി പ്രകടനം നടത്തിയിരുന്നു. ഇവർക്കെതിരെ സർവ്വകലാശാല അധികൃതരും പരാതി നൽകിയിട്ടുണ്ടെന്ന് പൊലീസ് അറിയിച്ചു. പ്രതികൾക്ക് കർശനമായ ശിക്ഷ ഉറപ്പ് വരുത്തുമെന്നും പൊലീസ് വ്യക്തമാക്കി.
ജമ്മുവിൽ നിന്ന് ശ്രീനഗറിലേക്ക് സി ആർ പി എഫ് ജവാന്മാരുമായി പോയ വാഹനങ്ങളുടെ നേർക്കായിരുന്നു 2019 ഫെബ്രുവരി 14ന് പുൽവാമയിൽ വെച്ച് ഭീകരർ ആക്രമണം നടത്തിയത്. ആക്രമണത്തിൽ 40 സി ആർ പി എഫ് ജവാന്മാർ വീരമൃത്യു വരിച്ചിരുന്നു. ആക്രമണം നടന്നതിന്റെ പന്ത്രണ്ടാം ദിവസം പാകിസ്ഥാനിലെ ബലാക്കോട്ടിലുള്ള ജെയ്ഷെ മുഹമ്മദ് ഭീകരക്യാമ്പുകളിൽ മിന്നലാക്രമണങ്ങൾ നടത്തിയ ഇന്ത്യ 300ൽ പരം ഭീകരരെ വധിച്ചിരുന്നു.
