പാറ്റ്‌ന:തെരഞ്ഞെടുപ്പ് നയതന്ത്രജ്ഞന്‍ പ്രശാന്ത് കിഷോറിനെതിരെയുള്ള വല മുറുകുന്നു. കോപ്പിയടി വിവാദത്തില്‍ പ്രശാന്ത കിഷോര്‍ വലിയ പ്രതിസന്ധിയിലേക്ക് നീങ്ങുകയാണെന്നാണ് റിപ്പോര്‍ട്ടുകള്‍. മറ്റൊരു തെരഞ്ഞെടുപ്പ് തന്ത്രജ്ഞനായ ശശ്വാന്ത് ഗൗതം നല്‍കിയ പരാതിയാണ് പ്രശാന്തിന് വെല്ലുവിളിയാകുന്നത്. പ്രശാന്ത് കിഷോറിനെതിരെ ഐ.പി.സി സെക്ഷന്‍ 420, 406 എന്നിവ ഉള്‍പ്പെടുത്തിയാണ് ഗൗതം പരാതി നല്‍കിയത്. വഞ്ചനയും വിശ്വാസ ലംഘനവും ആരോപിച്ച് പ്രശാന്ത് കിഷോറിനെതിരെ കേസെടുക്കുകയും ചെയ്തിരുന്നു.
പരാതിയില്‍ മുന്‍കൂര്‍ ജാമ്യമെടുക്കാന്‍ പ്രശാന്തിന്റെ അഭിഭാഷകന്‍ നീക്കം നടത്തിയെങ്കിലും പാറ്റ്‌ന ജില്ലാ കോടതി ജാമ്യാപേക്ഷ തള്ളി. കേസ് സെഷന്‍സ് കോടതിയിലേക്ക് മാറ്റിയിരിക്കുകയാണ്.ബീഹാര്‍ തെരഞ്ഞെടുപ്പില്‍ പ്രശാന്ത് കിഷോര്‍ അവതരിപ്പിച്ചിരിക്കുന്ന ‘ബാത് ബീഹാര്‍ കി’ എന്ന പ്രചരണ ആശയം താന്‍ കഴിഞ്ഞ മാസം പ്രഖ്യാപിച്ച ‘ബിഹാര്‍ കി ബാത്’ കോപ്പിയടിച്ചതാണെന്നാണ് ഗൗതമിന്റെ പരാതി. 2015ലെ ബീഹാര്‍ തെരഞ്ഞെടുപ്പില്‍ പ്രശാന്ത് കിഷോറിന്റെ സഹായിയായിരുന്ന തെരഞ്ഞെടുപ്പ് നയതന്ത്രജ്ഞയിരുന്നു താനെന്നും ശശ്വാന്ത് ഗൗതം അവകാശപ്പെട്ടിരുന്നു.
ഇതിനിടെ ഗൗതത്തിന് മറുപടിയുമായി പ്രശാന്ത് കിഷോര്‍ രംഗത്തെത്തി. തനിക്ക് ശശ്വാന്ത് ഗൗതം എന്നയാളെ ശരിക്ക് അറിയുകപോലുമില്ലെന്നാണ് പ്രശാന്തിന്റെ പ്രതികരണം. കഴിഞ്ഞ അഞ്ചുവര്‍ഷത്തിനിടയ്ക്ക് ശശ്വാന്ത് എന്നയാളെ താന്‍ നേരിട്ട് കണ്ടിട്ടില്ലെന്നും അദ്ദേഹം ‘ദ പ്രിന്റി’നോട് പറഞ്ഞു.
2015ലെ ബീഹാര്‍ നിയമസഭാ തെരഞ്ഞെടുപ്പില്‍ പ്രശാന്ത് കിഷോറും ശഷ്വാത് ഗൗതവും നിതീഷ് കുമാറിനുവേണ്ടി പ്രചാരണ പരിപാടികള്‍ ആസൂത്രണം ചെയ്തിരുന്നു. താനും പ്രശാന്തും നിരന്തരം ബന്ധപ്പെട്ടിരുന്നതിന്റെ ഇമെയില്‍ സന്ദേശങ്ങള്‍ തെളിവായി തന്റെ പക്കലുണ്ടെന്നും ശശ്വാന്ത് ഗൗതം പറഞ്ഞു. യു.എസിലെ ജോര്‍ജ് വാഷിങ്ടണ്‍ യൂണിവേഴ്‌സിറ്റിയില്‍നിന്നും ബിരുദാനന്തര ബിരുദം നേടിയ ഗൗതം കോണ്‍ഗ്രസിന്റെ പ്രചരണ പരിപാടികളുടെ ചുമതലയിലാണിപ്പോള്‍.
Discussion about this post