തിരുവനന്തപുരം: വിത്ഡ്രോവല് സിന്ഡ്രമുണ്ടെന്ന ഡോക്ടറുടെ കുറിപ്പടി ഉണ്ടെങ്കില് മദ്യം വീട്ടിലെത്തിച്ചു നല്കാന് ബെവ്കോ. ഇതിനായി നൂറ് രൂപ ആണ് സര്വീസ് ചാര്ജ്ജായി ഈടാക്കുന്നത്. എക്സൈസ് പാസ് നല്കുന്നവര്ക്ക് ബെവ്കോ ഗോഡൗണില് നിന്നാണ് മദ്യം എത്തിക്കുന്നത്.
അതേസമയം, മദ്യ വിതരണത്തോട് സഹകരിക്കാത്ത ജീവനക്കാരുടെ പേരും വിവരങ്ങളും സര്ക്കാരിന് കൈമാറുമെന്ന് ബെവ്കോ എംഡി സ്പര്ജന് കുമാര് വ്യക്തമാക്കി.
ഡോക്ടര്മാരുടെ കുറിപ്പടി പ്രകാരം മദ്യം നല്കാമെന്ന സര്ക്കാര് ഉത്തരവിറങ്ങിയതോടെ നടപടിക്രമങ്ങള് വിശദീകരിച്ചു കൊണ്ട് ബെവ്കോ ഗോഡൗണ് മാനേജര്മാര്ക്ക് ബെവ്കോ എംഡി നിര്ദേശം നല്കുകയായിരുന്നു. മദ്യം എത്തിച്ചു നല്കുന്നതിന് ആവശ്യമായ വാഹനങ്ങള് ഗോഡൗണ് മാനേജര്മാര് സംഘടിപ്പിക്കണം എന്നും സര്ക്കുലറില് വ്യക്തമാക്കുന്നു.
എക്സൈസിന്റെ പാസുമായി എത്തുന്നവര്ക്ക് ബെവ്കോയുടെ എസ്എല് 9 ലൈസന്സുള്ള ഗോഡൗണില് നിന്നായിരിക്കും മദ്യവിതരണം നടത്തുക. സംസ്ഥാനത്തെ എല്ലാ ബിവറേജസ് ഔട്ട്ലെറ്റുകളിലേക്കും മദ്യമെത്തിക്കുന്ന ഗോഡൗണുകളില് നിന്നാവും മദ്യം വിതരണം. ഗോഡൗണിലെ ഏറ്റവും വിലകുറഞ്ഞ മദ്യമായിരിക്കും നല്കുക. മൂന്നു ലിറ്റര് വീതം ഒരാള്ക്ക് ഒരാഴ്ചത്തേക്ക് നല്കാനാണ് പാസ്.
സര്ക്കാര് നിര്ദേശവും നടപടിയും പാലിക്കാത്തവരെ കുറിച്ചുള്ള പേര് വിവരങ്ങള് നല്കണമെന്നും സര്ക്കുലര് പറയുന്നുണ്ട്. ആവശ്യമെങ്കില് ഗോഡൗണ് മാനേജര്മാര്ക്ക് എക്സൈസിന്റെയോ പോലീസിന്റെയോ സഹായം തേടാം.
സര്ക്കാര് ആശുപത്രിയിലെ ഡോക്ടര്മാര്ക്കാണ് കുറിപ്പടി നല്കാനുള്ള അധികാരം.
Discussion about this post