കോട്ടയം: ജില്ലയിലെ സ്വകാര്യ ആശുപത്രിയില് പ്രസവത്തെ തുടര്ന്ന് യുവതി മരിച്ചു. പേരൂര് തച്ചനാട്ടേല് അഡ്വ. ടിഎന് രാജേഷിന്റെ ഭാര്യയും അരീപ്പറമ്പ് ഗവ. ഹയര് സെക്കന്ഡറി സ്കൂള് അധ്യാപികയുമായ ജി എസ് ലക്ഷ്മി (41) യാണ് മരിച്ചത്. ഏറ്റുമാനൂരിലെ തെള്ളകത്തുള്ള സ്വകാര്യ ആശുപത്രിയിലാണ് സംഭവം.
അതേസമയം, ചികിത്സാ പിഴവ് കാരണമാണ് മരണം സംഭവിച്ചതെന്ന് ആരോപിച്ച് ബന്ധുക്കള് ഏറ്റുമാനൂര് പൊലീസ് സ്റ്റേഷനില് പരാതി നല്കി.
വ്യാഴാഴ്ചയാണ് ലക്ഷ്മിയെ തെള്ളകത്തെ സ്വകാര്യ ആശുപത്രിയില് പ്രവേശിപ്പിച്ചത്. വെള്ളിയാഴ്ച നാലര മണിയോടെ പെണ്കുഞ്ഞിന് ജന്മം നല്കി. സാധാരണ പ്രസവം ആയിരുന്നുവെന്നും അമ്മയും കുഞ്ഞും സുഖമായി ഇരിക്കുന്നുവെന്നുമാണ് ഡോക്ടര് ആദ്യം ബന്ധുക്കളെ അറിയിച്ചത്.
എന്നാല് അഞ്ചരയോടെ ലക്ഷ്മിയ്ക്ക് രക്തസ്രാവം ഉണ്ടായി. രക്തം ആവശ്യമുണ്ടെന്നും ആശുപത്രിയില് നിന്ന് തന്നെ രക്തം തത്കാലം നല്കാമെന്നും അധികൃതര് പറഞ്ഞതായി ലക്ഷ്മിയുടെ ബന്ധുക്കള് പരാതിയില് പറയുന്നു.
ഏഴ് മണിയോടെ രക്തസ്രാവം നിലയ്ക്കുന്നില്ലെന്നും ഇതിനിടെ രണ്ട് തവണ ഹൃദയസ്തംഭനം ഉണ്ടായെന്നും കൂടാതെ രക്തസ്രാവം നിലയ്ക്കാത്തതിനാല് ഗര്ഭപാത്രം നീക്കേണ്ടിവന്നതായി ഏഴരയോടെ ഡോക്ടര് അറിയിച്ചുവെന്നും ബന്ധുക്കള് നല്കിയ പരാതിയില് പറയുന്നു. പിന്നീട് ലക്ഷ്മി മരിച്ചതായി ആശുപത്രി അധികൃതര് ഭര്ത്താവിനെ അറിയിക്കുകയായിരുന്നു.
പരാതിയുടെ അടിസ്ഥാനത്തില് ഏറ്റുമാനൂര് പൊലീസ് അന്വേഷണം ആരംഭിച്ചു.
Discussion about this post