തിരുവനന്തപുരം: പ്രധാനമന്ത്രി നരേന്ദ്ര മോദി വിളിച്ച യോഗത്തിൽ മുഖ്യമന്ത്രി പിണറായി വിജയൻ പങ്കെടുക്കാഞ്ഞത് അനുചിതമെന്ന് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ. പ്രധാനമന്ത്രിയുടെ യോഗത്തെ മുഖ്യമന്ത്രി ലാഘവത്തോടെയാണ് കാണുന്നതെന്നും തനിക്ക് പറയാനുള്ളത് ചീഫ് സെക്രട്ടറിയെ കൊണ്ട് എഴുതി നൽകിയത് ശരിയായില്ലെന്നും അദ്ദേഹം പറഞ്ഞു. ടീം ഇന്ത്യ എന്ന സങ്കൽപ്പത്തിനു വിരുദ്ധമാണ് മുഖ്യമന്ത്രിയുടെ നിലപാടെന്നും അദ്ദേഹം വിമർശിച്ചു.
കേറോണ രോഗം സംബദ്ധിച്ച് സംസ്ഥാന സർക്കാർ പുറത്ത് വിടുന്ന വിവരങ്ങൾ ശരിയല്ലെന്ന് കെ സുരേന്ദ്രൻ പറഞ്ഞു. ടെസ്റ്റുകളെ സംബന്ധിച്ച് സർക്കാർ പല വിവരങ്ങളും മറച്ചു വെയ്ക്കുകയാണ്. കൊറോണയുമായി ബന്ധപ്പെട്ട ഡേറ്റാ ചോർച്ച ഗുരുതര പ്രശ്നമാണെന്നും അദ്ദേഹം വ്യക്തമാക്കി. സ്പ്രിംഗ്ലറിനെ സഹായിക്കാനുള്ള മുൻകൂർ നടപടിയുടെ ഭാഗമായാണോ ഇപ്പോൾ ഡേറ്റ ചോർന്നതെന്ന് സംശയിക്കേണ്ടിയിരിക്കുന്നു എന്നും അദ്ദേഹം പറഞ്ഞു.
നിരീക്ഷണത്തിലുണ്ടായിരുന്ന തിരുവനന്തപുരത്തെ കൊറോണ രോഗിയുടെ റൂട്ട് മാപ്പ് തയ്യാറാക്കുന്നതിൽ സംസ്ഥാന സർക്കാരിന് വീഴ്ച്ച സംഭവിച്ചതായി അദ്ദേഹം ആരോപിച്ചു. നിരീക്ഷണത്തിലിരിക്കെ തന്നെ ഇയാളും കുടുംബവും നിരവധി സ്ഥലങ്ങൾ സന്ദർശിച്ചു. ചാത്തന്നൂരിലെ ആശാ വർക്കർക്കടക്കം രോഗം പിടിപെട്ടത് എങ്ങനെയാണെന്ന് സർക്കാരിന് സ്ഥിരീകരിക്കാനായിട്ടില്ലെന്നും കെ സുരേന്ദ്രൻ പറഞ്ഞു.
