തിരുവനന്തപുരം: സുരക്ഷാ ഉപകരണങ്ങൾക്ക് ലഭ്യതക്കുറവുണ്ടെന്ന് കാട്ടി സർക്കാർ ഡോക്ടർമാരുടെ സംഘടനയായ കെ ജി എം ഒ എ മുഖ്യമന്ത്രിക്ക് കത്തയച്ചു. ലഭ്യമായിട്ടുള്ള സുരക്ഷാ ഉപകരണങ്ങളിൽ മിക്കതിനും വേണ്ടത്ര ഗുണനിലവാരമില്ലെന്നും കത്തിൽ ചൂണ്ടിക്കാട്ടുന്നു.
കാഴ്ചയ്ക്ക് എൻ95 പോലെ തോന്നുന്ന മാസ്കുകളാണ് വിതരണം ചെയ്യുന്നത്. എന്നാൽ ഇവയ്ക്ക് മതിയായ സുരക്ഷിതത്വം ഇല്ല. പിപിഇ കിറ്റുകളും മാനദണ്ഡം അനുസരിച്ച് ഉള്ളവയല്ല. ഉപകരണങ്ങളുടെ ഗുണനിലവാരം അടിയന്തരമായി ഉറപ്പാക്കണം. സുരക്ഷാ ഉപകരണങ്ങളുടെ ലഭ്യതക്കുറവുണ്ട് എന്നത് യാഥാർത്ഥ്യമാണ്. പ്രാഥമിക ആരോഗ്യകേന്ദ്രങ്ങളില്‍ ആവശ്യത്തിന് എൻ95 മാസ്കുകളില്ലെന്നും സർക്കാർ ഡോക്ടർമാരുടെ സംഘടനയായ കേരള ഗവൺമെന്റ് മെഡിക്കൽ ഓഫീസേഴ്സ് അസോസിയേഷൻ മുഖ്യമന്ത്രി പിണറായി വിജയന് അയച്ച കത്തിൽ വ്യക്തമാക്കുന്നു.
അതേസമയം സംസ്ഥാനത്തെ ചില സ്വകാര്യ ആശുപത്രികളിലും ആവശ്യത്തിന് സുരക്ഷാ ഉപകരണങ്ങളില്ലാതെ നേഴ്സുമാർ അടക്കമുള്ള ജീവനക്കാർ ജോലി ചെയ്യേണ്ടി വരുന്ന സാഹചര്യം നിലവിലുണ്ടെന്നും ആക്ഷേപം ഉയരുന്നുണ്ട്.
