മുംബൈ: ബാങ്ക് വായ്പാ തട്ടിപ്പ് പ്രതിയായ വിജയ് മല്യയെ ഉടന്‍ ഇന്ത്യയ്ക്ക് കൈമാറും. ഇന്ത്യയും ബ്രിട്ടനും തമ്മിലുള്ള നിയമ നടപടികള്‍ പൂര്‍ത്തിയായതായി റിപ്പോര്‍ട്ട്.
ഇന്ത്യയിലെ ബാങ്കുകളില്‍ നിന്ന് കോടിക്കണക്കിന് രൂപ വായ്പയെടുത്ത് രാജ്യം വിട്ട കുറ്റവാളിയാണ് വിജയ് മല്ല്യ. ബ്രിട്ടനില്‍ എത്തിയ വിജയ് മല്യയെ ബ്രിട്ടീഷ് സര്‍ക്കാരും കൈയൊഴിഞ്ഞു. ഇന്ത്യയിലേക്ക് തിരികെ അയക്കരുതെന്ന മല്യയുടെ അവസാനത്തെ ഹര്‍ജിയും യുകെ കോടതി തള്ളിയതോടെയാണ് ഇദ്ദേഹത്തെ ഇന്ത്യയ്ക്ക് കൈമാറാന്‍ ധാരണയായത്.
മെയ് 14നായിരുന്നു ഹര്‍ജി പരിഗണിച്ചത്. ഹര്‍ജി തള്ളിയതിന് ശേഷം 20 ദിവസം പിന്നിട്ടിരിക്കുകയാണ്. 28 ദിവസത്തിനുള്ളില്‍ മല്യയെ തിരിച്ച് എത്തിക്കേണ്ടതുണ്ട്.ബ്രിട്ടനില്‍നിന്ന് തിരികെയുള്ള യാത്രയുമായി ബന്ധപ്പെട്ട നിയമ നടപടിക്രമങ്ങള്‍ പൂര്‍ത്തിയായെന്ന് റിപ്പോര്‍ട്ടുകള്‍ വ്യക്തമാക്കുന്നു.
ഇന്ത്യയിലാകട്ടെ മുംബൈയിലെ ആര്‍തര്‍ റോഡ് ജയിലില്‍ മല്യയ്ക്കായി പുതിയ വാസസ്ഥാനം ഒരുങ്ങുകയാണ്. വിജയ മല്യയുടെ ആരോഗ്യസ്ഥിതി പരിശോധിക്കാന്‍ മെഡിക്കല്‍ സംഘത്തെ വിമാനത്താവളത്തില്‍ നിയോഗിച്ചു. ആര്‍തര്‍ റോഡ് ജയിലിലെ അതീവ സുരക്ഷയുള്ള ബാരക്കുകളിലൊന്നിലെ രണ്ട് നില കെട്ടിടത്തിലാണ് മല്യയെ പാര്‍പ്പിക്കുകയെന്നും യുകെ കോടതിയെ തന്നെ ഇന്ത്യ അറിയിച്ചിരുന്നു.
മുംബൈയിലാണ് മല്യക്കെതിരായ കേസ് രജിസ്റ്റര്‍ ചെയ്തിരിക്കുന്നത്. പിന്നീട് കോടതില്‍ ഹാജരാക്കുന്ന മല്യയെ കസ്റ്റഡിയില്‍ വേണമെന്ന് സിബിഐയും ഇഡിയും ആവശ്യപ്പെട്ടേക്കും. വിവിധ ബേങ്കുകളിലായി 9000 കോടി രൂപ കിട്ടാക്കടമാക്കിയ ശേഷമാണ് മല്യ 2016ല്‍ വിദേശത്തേക്ക് കടന്നത്. 17 ഓളം ഇന്ത്യന്‍ ബാങ്കുകളില്‍ നിന്ന് വായ്പയെടുത്ത് തിരിച്ച് അടക്കാതെയാണ് മല്യ രാജ്യം വിട്ടത്.
Discussion about this post