വാഷിങ്ടന്: 2008 മുംബൈ ഭീകരാക്രമണക്കേസിന്റെ ഗൂഢാലോചനയുമായി ബന്ധപ്പെട്ട് വിചാരണ നേരിടുന്ന തഹാവുര് ഹുസൈന് റാണ(59) അമേരിക്കയില് വീണ്ടും അറസ്റ്റില്. ഇയാളെ ഉടന് ഇന്ത്യയ്ക്ക് കൈമാറും.ഇന്ത്യയില് വിചാരണ നേരിടുന്നതിനാലാണ് ജാമ്യം ലഭിച്ച് പുറത്തിറങ്ങിയ റാണയെ വീണ്ടും അറസ്റ്റ് ചെയ്യാന് അധികൃതര് തീരുമാനിച്ചത്.
കഴിഞ്ഞ പത്തു വര്ഷമായി സതേണ് കലിഫോര്ണിയയിലെ ടെര്മിനല് ഐലന്റ് ജയിലില് ശിക്ഷ അനുഭവിച്ച് വരികയായിരുന്ന റാണ കോവിഡ് സ്ഥിരീകരിച്ചതിനെ തുടര്ന്നാണ് ജയില് മോചിതനായത്.
റാണയുടെ 14 വര്ഷത്തെ ജയില് ശിക്ഷ അവസാനിക്കുന്നത് 2021 ഡിസംബറിലാണ്. ഇതിനു മുമ്പു തന്നെ റാണയെ ഇന്ത്യയിലേക്ക് അയയ്ക്കുമെന്നു വാര്ത്തകള് പുറത്ത് വന്നിരുന്നു. അമേരിക്കന് പൗരന്മാര് ഉള്പ്പെടെ 166 പേരുടെ മരണത്തിനിടയാക്കിയ മുംബൈ ഭീകരാക്രമണക്കേസുമായി ബന്ധപ്പെട്ട് ചിക്കാഗോ സ്വദേശിയായ റാണയെ 2009ലാണ് അറസ്റ്റ് ചെയ്തത്. മുംബൈ ഭീകരാക്രമണക്കേസില് റാണയുടെ പങ്ക് വ്യക്തമാക്കുന്ന തെളിവുകള് ഇന്ത്യ യുഎസിനു കൈമാറിയെന്നു റിപ്പോര്ട്ടുകള് ഉണ്ടായിരുന്നു.
ശിക്ഷാകാലാവധി അവസാനിക്കുന്നതിനു മുമ്പ് റാണയെ ഇന്ത്യ ശ്രമം നടത്തിയിരുന്നു, ട്രംപ് ഭരണകൂടത്തിന്റെ പൂര്ണ പിന്തുണയോടെ നടപടിക്രമങ്ങള് ത്വരിതഗതിയിലാക്കിയിരുന്നു. പാക്ക് വംശജനായ റാണയ്ക്ക് കനേഡിയന് പൗരത്വമാണുള്ളത്.
Discussion about this post