കൊട്ടാരക്കര: വിലങ്ങറ ഗീതാഭവനില് ഓമനയമ്മയ്ക്ക് ഇക്കുറി ഓണം പകരം വയ്ക്കാനില്ലാത്ത വെളിച്ചത്തിന്റെ ഉത്സവമാണ്. കൊട്ടാരക്കര ഈസ്റ്റ് വൈദ്യുത സെക്ഷന് ഓഫീസിലെ ജീവനക്കാരാണ് ദുരിതങ്ങള് ഇരുട്ടു പരത്തിയ ഓമനയമ്മയുടെ വീട്ടില് നന്മയുടെ വെളിച്ചം നിറച്ചത്.
കുറച്ചുനാള് മുമ്പ് വൈദ്യുത ബില് കുടിശ്ശികയെ തുടര്ന്ന് ഓമനയമ്മയുടെ വീട്ടിലെ കണക്ഷന് വിച്ഛേദിക്കാനെത്തിയ ജീവനക്കാരെ കാത്തിരുന്നത് മനസ്സാക്ഷി ഉണര്ത്തുന്ന കാഴ്ചയായിരുന്നു. ശരീരം തളര്ന്ന രണ്ട് പെണ്മക്കളുമായി ദുരിതജീവിതം നയിക്കുന്ന ഒരമ്മ. ജന്മനായുള്ള വൈകല്യം മൂലം പരസഹായം കൂടാതെ പ്രാഥമികാവശ്യങ്ങള് നിര്വഹിക്കാന് പോലും ശേഷിയില്ലാത്ത 28ഉം 30ഉം വയസ്സുള്ള പെണ്മക്കളുമായി വിധിയോട് പോരാടുന്ന ഓമനയമ്മയുടെ അവസ്ഥയില് മനംനൊന്താണ് ജീവനക്കാര് മടങ്ങിയത്. മറ്റാരും ആശ്രയമില്ലാത്ത കുടുംബത്തിനെ തങ്ങളാലാകും വിധം സഹായിക്കാന് സെക്ഷനിലെ ജീവനക്കാര് തീരുമാനിച്ചു.
ഇക്കുറി ഓഫീസിലെ ഓണാഘോഷം ഒഴിവാക്കാനും അതിനായി സ്വരൂപിക്കുന്ന തുക ഓമനയമ്മയുടെ കുടുംബത്തിന് നല്കാനും അവര് നിറഞ്ഞ മനസ്സോടെ തീരുമാനിച്ചു. ഓമനയമ്മയുടെ കുടിശ്ശികയുള്ള വൈദ്യുതി ചാര്ജ്ജും ജീവനക്കാര് തന്നെ അടച്ചു. ഓമനയമ്മയ്ക്കും മക്കള്ക്കും ഓണസദ്യ ഒരുക്കാനുള്ള വിഭവങ്ങളും വാങ്ങിയാണ് ജീവനക്കാര് വീട്ടിലെത്തിയത്. ഓണ സമ്മാനങ്ങളും ധനസഹായവും കൈമാറിയ അവര് വൈദ്യുതി കുടിശ്ശിക തീര്ത്തതിന്റെ രസീതും കൈമാറി. പകരം വയ്ക്കാനില്ലാത്ത നന്മയുടെ വെളിച്ചം തെളിച്ചാണ് അസിസ്റ്റന്റ് എന്ജിനിയര് ജി.മധുസൂദനന് പിള്ളയും ജീവനക്കാരും ഓമനയമ്മയുടെ വീട്ടില്നിന്ന് മടങ്ങിയത്.
Discussion about this post