ഇന്ത്യയ്ക്കെതിരെ ആണവായുധം പ്രയോഗിക്കുമെന്ന പാക് റെയിൽവേ മന്ത്രിയുടെ പ്രസ്താവനയിൽ സാമൂഹികമാധ്യമങ്ങളിൽ പ്രതിഷേധം പുകയുന്നു.സമാ ടിവിക്ക് നൽകിയ അഭിമുഖത്തിലാണ് പാക് റെയിൽവേ മന്ത്രിയായ ഷെയ്ക് റഷീദ് ഇങ്ങനെയൊരു പ്രസ്താവന നടത്തിയത്.
“ഇന്ത്യയിലെ മുസ്ലീങ്ങൾക്ക് ആപത്തു സംഭവിക്കാത്ത വിധത്തിൽ ചെറുതും കൃത്യതയാർന്നതുമായ ആണവായുധം പ്രയോഗിക്കാൻ പാകിസ്ഥാന് സാധിക്കും” അഭിമുഖത്തിൽ മന്ത്രി പറഞ്ഞു. ചെറുതും വലുതുമായ ആണവായുധങ്ങൾ പാകിസ്ഥാന്റെ പക്കലുണ്ടെന്നും പ്രത്യേക മേഖലകളെ മാത്രം ലക്ഷ്യമാക്കി ആക്രമണം നടത്താൻ കെൽപ്പുള്ളവയാണ് ആ ആയുധങ്ങളെന്നും ഷെയ്ക് റഷീദ് കൂട്ടിച്ചേർത്തു. അതേസമയം, മന്ത്രിയുടെ ഈ പ്രസ്താവനയ്ക്ക് പാകിസ്ഥാനിൽ നിന്ന് തന്നെ വ്യാപക വിമർശനമാണ് ഉയരുന്നത്.ഇതിനെ അപലപിച്ചു കൊണ്ട് നിരവധി പേരാണ് സാമൂഹിക മാധ്യമങ്ങളിൽ രംഗത്തെത്തുന്നത്.സൗദി കിരീടാവകാശിയുമായി കൂടിക്കാഴ്ച നടത്താൻ സാധിക്കാതെ നാണം കെട്ട് പാക് സൈനിക മേധാവി ജനറൽ ഖമർ ജാവേദ് ബജ്‌വ തിരികെയെത്തിയതിൽ നിന്നും മാധ്യമ ശ്രദ്ധ തിരിക്കാനാണ് ഇത്തരം പ്രസ്താവനകൾ ഷെയ്ക് റഷീദ് നടത്തുന്നതെന്നാണ് ജനങ്ങൾ സമൂഹമാധ്യമങ്ങളിൽ ആരോപിക്കുന്നത്.
