കേരളത്തിൽ ജനക്ഷേമവും കുട്ടികളുടെ സുരക്ഷയും മുൻനിർത്തിയുള്ള ഭരണത്തിന് പകരം ‘യുഡിഎഫ്-ബിജെപി ടീമിന്റെ’ ഭരണമാണ് നടക്കുന്നതെന്ന് രൂക്ഷവിമർശനവുമായി സിപിഐഎം നേതാവ് എം.വി ജയരാജൻ. സംസ്ഥാനത്തെ സർക്കാർ ആശുപത്രികളിൽ രോഗികൾക്ക് ചികിത്സയ്ക്കാവശ്യമായ പഞ്ഞിപോലും ലഭ്യമാകാത്ത ദയനീയ സാഹചര്യമാണെന്നും എന്നിട്ടും സംബന്ധിച്ച മന്ത്രിയുടെ വായാടിത്തത്തിന് യാതൊരു കുറവുമില്ലെന്നും അദ്ദേഹം കുറ്റപ്പെടുത്തി.
കായികമേളയ്ക്കിടെ അപകടമുണ്ടായപ്പോൾ പരിക്കേറ്റവരെ ആശുപത്രിയിലെത്തിക്കാൻ പോലും ആവശ്യമായ സംവിധാനങ്ങളുണ്ടായിരുന്നില്ലെന്നും, കായികമന്ത്രിയുടെ ഭാഗത്തുനിന്നുണ്ടായ വീഴ്ചയ്ക്ക് വിദ്യാഭ്യാസ മന്ത്രിയെ പഴിചാരി രക്ഷപ്പെടാനാണ് ശ്രമമെന്നും ജയരാജൻ ആരോപിച്ചു.
പോലീസ് നടപടികളെ ശക്തമായി വിമർശിച്ച അദ്ദേഹം, കോൺഗ്രസുകാരോ ബിജെപിക്കാരോ കുറ്റം ചെയ്താൽ കേസെടുക്കാതിരിക്കുകയും സിപിഐഎം പ്രവർത്തകർക്കെതിരെ മാത്രം കേസെടുക്കുകയും ചെയ്യുന്ന രീതിയാണ് നിലവിലുള്ളതെന്ന് പറഞ്ഞു. എസ്‌എഫ്‌ഐ ജില്ലാ സെക്രട്ടറിക്കെതിരെ ഭീഷണി മുഴക്കിയ എസ്ഐ ഗോകുലിനെ പുറത്താക്കുന്നതുവരെ പാർട്ടി പ്രതിഷേധം തുടരുമെന്നും അദ്ദേഹം വ്യക്തമാക്കി. പി. നന്ദകുമാറിന്റെ മലപ്പുറം പരാമർശവുമായി ബന്ധപ്പെട്ട്, ഒരു ജില്ലയെയും അപമാനിക്കുന്ന നിലപാട് സിപിഐഎമ്മിനില്ലെന്ന് വ്യക്തമാക്കിയ ജയരാജൻ, മുസ്‌ലിം ലീഗ് ഒരേസമയം ജമാഅത്തെ ഇസ്‌ലാമിയുമായി കൂട്ടുകൂടുകയും ബിജെപിയുമായി ധാരണയുണ്ടാക്കുകയും ചെയ്തുവെന്നും ലീഗ് മന്ത്രിമാരുടെ നേതൃത്വത്തിൽ ബിജെപി അജണ്ടയാണ് നടപ്പാക്കുന്നതെന്നും ആരോപിച്ചു.
