ന്യൂഡൽഹി : പ്രമുഖ പൊതുമേഖലാ എണ്ണ വിതരണ കമ്പനിയായ ഇന്ത്യൻ ഓയിൽ കോർപ്പറേഷന്റെ ചാർട്ടേഡ് എണ്ണ കപ്പലിൽ തീപിടുത്തം.കുവൈറ്റിൽ നിന്ന് ഇന്ത്യയിലെ പാരാദ്വീപിലേക്കുള്ള യാത്രയ്ക്കിടെ ശ്രീലങ്കയുടെ കിഴക്കൻ തീരത്ത് വെച്ചാണ് അപകടമുണ്ടായത്.തീപിടുത്തമുണ്ടായ ന്യൂ ഡയമണ്ട് എന്ന കപ്പലിൽ രക്ഷാപ്രവർത്തനം തുടരുകയാണ്.
ശ്രീലങ്കയുടെ കിഴക്കൻ തീരത്തു നിന്ന് 20 നോട്ടിക്കൽ മൈൽ അകലെയാണ് തീപിടിത്തമുണ്ടായത്.രക്ഷാപ്രവർത്തനം നടത്തുന്നതിനായി രണ്ട് നാവിക കപ്പലും വിമാനവും വിന്യസിച്ചിട്ടുണ്ടെന്ന് ശ്രീലങ്കൻ നാവിക സേന പ്രതിനിധി കമാൻഡർ രഞ്ജിത്ത് രാജ്പക്സെ വ്യക്തമാക്കി.കുവൈറ്റിലെ മിനാ അൽ അഹമ്മദിയിൽ നിന്നും പുറപ്പെട്ട കപ്പലിൽ 2,70,000 ടൺ ക്രൂഡോയിലാണ് ഉണ്ടായിരുന്നത്.ക്രൂഡോയിൽ ചോരുന്നത് ഒഴിവാക്കാനുള്ള നടപടികൾ ആരംഭിച്ചതായി ശ്രീലങ്കൻ അധികൃതർ അറിയിച്ചു.
