ഗോരഖ്പൂർ : മറ്റു ഗ്രാമങ്ങൾക്ക് മാതൃകയായി ഉത്തർപ്രദേശിലെ കുറ്റകൃത്യ രഹിത ഗ്രാമമായ ചിടോവ്ന.ഗോരഖ്പൂരിലുള്ള ചിടോവ്നയിപ്പോൾ വെള്ളം, വൈദ്യുതി, റോഡുകൾ ഉൾപ്പെടെ എല്ലാ വിധ അടിസ്ഥാന സൗകര്യങ്ങളുമുള്ള ഗ്രാമമായി മാറിയിരിക്കുകയാണ്. ഒന്നര വർഷത്തിലധികമായി ഈ ഗ്രാമത്തിൽ മോഷണം, പിടിച്ചുപറി പോലുള്ള കുറ്റകൃത്യങ്ങളൊന്നും തന്നെ റിപ്പോർട്ട് ചെയ്തിട്ടില്ലെന്നാണ് ചിടോവ്നയുടെ ഏറ്റവും വലിയ പ്രത്യേകത. മുഖ്യമന്ത്രി യോഗി ആദിത്യനാഥിന്റെ സ്വന്തം മണ്ഡലമായ ഗോരഖ്പൂർ ജില്ലയിലാണ് ചിടോവ്ന ഗ്രാമം.
ഗ്രാമവാസികളുടെ സുരക്ഷ ഉറപ്പാക്കാൻ ചിടോവ്നയിലെ ഓരോ വീടിനു പുറത്തും ഭരണകൂടം സിസിടിവി ക്യാമറകൾ സ്ഥാപിച്ചിട്ടുണ്ടെന്നാണ് പുറത്തു വന്നിട്ടുള്ള റിപ്പോർട്ടുകൾ വ്യക്തമാക്കുന്നത്. ഇത് തന്നെയാണ് ഒരു പരിധി വരെ ചിടോവ്നയെ കുറ്റകൃത്യ രഹിത ഗ്രാമമായി നിലനിർത്തുന്നതും. 295 വീടുകളിലായി ആയിരത്തി അഞ്ഞൂറോളം പേരാണ് ഈ ഗ്രാമത്തിൽ താമസിക്കുന്നുണ്ട്. ഗ്രാമത്തിലെ വികസന പ്രവർത്തനങ്ങൾക്കു പിന്നിൽ ഗ്രാമത്തലവൻ ദിനേശ് യാദവാണെന്നാണ് ഗ്രാമവാസികൾ അഭിപ്രായപ്പെടുന്നത്.
