ഡൽഹി: കോൺഗ്രസിന് നേട്ടം എപ്പോഴും രാഷ്ട്രീയലാഭം മാത്രമെന്ന് ജെ.പി നദ്ദ. കാർഷിക മേഖലയുമായി ബന്ധപ്പെട്ട മൂന്ന് ബില്ലുകൾ സംബന്ധിച്ച തർക്കത്തിനിടയിലാണ് ബിജെപി പ്രസിഡന്റ് ജെപി നദ്ദ കോൺഗ്രസിനെതിരെ രൂക്ഷ വിമർശനമുന്നയിച്ചത്.
രാഷ്ട്രീയ കാരണങ്ങളാൽ ബില്ലുകളെ കോൺഗ്രസ് എതിർക്കുന്നുവെന്ന് അദ്ദേഹം പറഞ്ഞു.മാണ്ഡികൾ അവസാനിക്കുന്നില്ലെന്നും നദ്ദ വ്യക്തമാക്കി.
പ്രധാനമന്ത്രി നരേന്ദ്രമോദി എല്ലായ്പ്പോഴും കർഷകരെയും ദരിദ്രരെയും തൊഴിലാളികളെയും ചൂഷണം ചെയ്യപ്പെടുന്നവരെയും മുഖ്യധാരയിലേക്ക് കൊണ്ടു വരാനാണ് ശ്രമിക്കുന്നത്. അവരെയാണ് പ്രധാനമന്ത്രി സേവിക്കുന്നത്. അവരുടെ ശാക്തീകരണമാണ് ലക്ഷ്യമിടുന്നത്. പാവപ്പെട്ട ജനവിഭാഗങ്ങളുടെ വളർച്ച ലക്ഷ്യമിട്ടാണ് പദ്ധതികൾ വിഭാവനം ചെയ്യുന്നത്.
കർഷകരുടെ ഉത്പന്നങ്ങൾക്ക് വില മെച്ചപ്പെടുത്തുക. അതിനായുള്ള വാണിജ്യ നിയമവും വില മെച്ചപ്പെടുത്തലും സംരക്ഷണ ഉടമ്പടിയും അത്യാവശ്യമാണ്. കാർഷികമേഖലയിലെ നിക്ഷേപം വർദ്ധിപ്പിക്കേണ്ടത് അനിവാര്യമാണ്. ഈ മൂന്ന് ബില്ലുകൾ കർഷകരുടെ ഉൽപന്നങ്ങളുടെ വില വർദ്ധിപ്പിക്കുമെന്ന് ബിജെപി പ്രസിഡന്റ് പറഞ്ഞു.
ഇന്ന് കോൺഗ്രസ് പാർട്ടി ഈ ബില്ലുകളെ എതിർക്കുകയാണെന്നും അദ്ദേഹം പറഞ്ഞു. കോൺഗ്രസ് പാർട്ടിക്ക് ഇരട്ട മുഖമുണ്ട്, എല്ലാ കാര്യങ്ങളിലും രാഷ്ട്രീയം നടത്തുക എന്നത് എല്ലായ്പ്പോഴും അവരുടെ ജോലിയാണ്. കോൺഗ്രസിന് രാഷ്ട്രീയമല്ലാതെ മറ്റൊന്നും അറിയില്ലെന്നും നദ്ദ വ്യക്തമാക്കി.
