ഐസ്വാൾ : ആയുധങ്ങൾ കടത്താൻ ശ്രമിച്ച മൂന്നു പേരെ മിസോറാമിലെ പടിഞ്ഞാറൻ ഫെയ്ലെങിൽ നിന്നും ബോർഡർ സെക്യൂരിറ്റി ഫോഴ്സ് പിടികൂടി. ആയുധങ്ങളുടെയും സ്ഫോടക വസ്തുക്കളുടെയും വൻശേഖരമാണ് ഇവരിൽ നിന്നും പിടികൂടിയത്.
രണ്ട് പിക്കപ്പ് വാഹനങ്ങളിലെ രഹസ്യഅറയിലായി ഒളിപ്പിച്ചിരുന്ന 28 എ.കെ സീരീസ് റൈഫിളുകൾ, ഒരു എകെ 74, ഒരു 0.30 ഇഞ്ച് കാർബൈൻ, 28 മാഗസിൻ, 7894 വെടിക്കോപ്പുകൾ, 2 ഖുക്രി എന്നിവ സുരക്ഷാ ഉദ്യോഗസ്ഥർ പിടിച്ചെടുത്തിട്ടുണ്ട്. ഈ ആയുധങ്ങൾ ഇന്ത്യയുടെ വടക്ക് കിഴക്കൻ പ്രദേശങ്ങളിലുള്ള കലാപകാരികൾക്ക് വിതരണം ചെയ്യുകായെന്ന ഉദ്ദേശത്തോടെ കൊണ്ടു വന്നതാണെന്നാണ് വിലയിരുത്തൽ.
പടിഞ്ഞാറൻ ഫെയ്ലെങിലൂടെ ആയുധക്കടത്ത് നടത്തുന്നുണ്ടെന്ന രഹസ്യ വിവരം ലഭിച്ചതിനെ തുടർന്ന് നടത്തിയ അന്വേഷണത്തിലാണ് കുറ്റവാളികളെ പിടികൂടാനായതെന്ന് ബി.എസ്എഫ് സൈനികർ അറിയിച്ചു. ദേശവിരുദ്ധ പ്രവർത്തനങ്ങൾ നടത്തുന്നവർക്ക് വിതരണം ചെയ്യുന്നതിനായി എത്തിച്ച ആയുധങ്ങൾ പിടികൂടിയത് മിസോറാമിലെ മാമിത് ജില്ല ആസ്ഥാനമായി പ്രവർത്തിക്കുന്ന 90 ബറ്റാലിയൻ ബിഎസ്എഫിലെ ഉദ്യോഗസ്ഥരാണ്.
Discussion about this post