പ്രധാനമന്ത്രി നരേന്ദ്രമോദിയെ പരിഹസിച്ച രാഹുൽ ഗാന്ധിയ്ക്ക് കടുത്ത മറുപടിയുമായി കേന്ദ്രമന്ത്രി സ്മൃതി ഇറാനി. ഡാനിഷ് വിന്റ് ടർബൈൻ കമ്പനിയുടെ തലവനായ ഹെന്റിക് ആൻഡേഴ്‌സനുമായി നടത്തിയ വീഡിയോ കോൺഫറൻസിൽ കാറ്റിൽ നിന്നും വൈദ്യുതി ഉല്പാദിപ്പിക്കുന്ന വിന്റ് ടർബൈനുകൾ അന്തരീക്ഷത്തിലെ ഈർപ്പം ശേഖരിക്കുമെന്നും ജലദൗർലഭ്യം പരിഹരിക്കാൻ അവ ഉപയോഗപ്പെടുമെന്നും മോദി സൂചിപ്പിച്ചിരുന്നു. പ്രധാനമന്ത്രിയുടെ ഈ പ്രസ്താവനയെ പരിഹസിച്ചാണ് രാഹുൽ ഗാന്ധി രംഗത്തുവന്നത്.
എന്നാൽ, അപൂർവ്വമായി ഇന്ത്യൻ രാഷ്ട്രീയത്തിൽ ഒരു വ്യക്തി തന്റെ അറിവില്ലായ്മ നിലനിർത്താൻ ബോധപൂർവ്വമായ ശ്രമം നടത്തുന്നുണ്ടെന്ന് രാഹുൽഗാന്ധിയെ ടാഗ് ചെയ്ത് സ്മൃതി ഇറാനി പരിഹസിച്ചു. ഇന്ത്യയുടെ യഥാർത്ഥ അപകടം നമ്മുടെ പ്രധാനമന്ത്രിക്ക് മനസ്സിലാകില്ല എന്നതല്ല, അത്‌ ഒരു കാര്യം അദ്ദേഹത്തോട് പറയാൻ മറ്റാർക്കും ധൈര്യമില്ലായെന്നതാണെന്ന് മോദി ഹെന്റിക് ആൻഡേഴ്‌സനുമായി നടത്തിയ ചർച്ചയുടെ വീഡിയോ പങ്കു വെച്ച് രാഹുൽ ഗാന്ധി ട്വീറ്റ് ചെയ്യുകയായിരുന്നു.
എന്നാൽ, തന്റെ അറിവില്ലായ്മ തഴച്ചു വളരുന്നുവെന്ന് യുവരാജാവിനോട് പറയാൻ ആർക്കും ധൈര്യമില്ലാത്തതാണ് കോൺഗ്രസിന്റെ യഥാർത്ഥ പ്രശ്നമെന്ന് ട്വീറ്റ് ചെയ്ത് സ്മൃതി ഇറാനി അതേനാണയത്തിൽ രാഹുൽ ഗാന്ധിക്കെതിരെ തിരിച്ചടിച്ചു. കേന്ദ്രമന്ത്രി പിയൂഷ് ഗോയലും ഇതിനു സമാനമായ മറുപടി രാഹുൽ ഗാന്ധിക്ക് നൽകി രംഗത്തു വന്നിരുന്നു.
Discussion about this post