നാഗ്പൂർ : മഹാരാഷ്ട്രയിലെ നോർത്ത് ഗഡ്ചിറോലിയിൽ വെച്ച് 6 മാവോയിസ്റ്റുകളെ സി -60 കമാന്റോസ് എൻകൗണ്ടറിൽ കൊലപ്പെടുത്തി. നോർത്ത് ഗഡ്ചിറോലിയിലെ ധനോറ താലുകയിലുള്ള കോസ്മി കിസ്നേലി ഫോറസ്റ്റിലുണ്ടായ എൻകൗണ്ടറിൽ കൊല്ലപ്പെട്ടവരിൽ 4 സ്ത്രീകളും ഉൾപ്പെടുന്നുണ്ട്. കഴിഞ്ഞ രണ്ട് വർഷത്തിനിടെ വിവിധ എൻകൗണ്ടറുകളിലായി ഇരുപതിലധികം മാവോയിസ്റ്റുകളെയാണ് ഗഡ്ചിറോലി പോലീസ് കൊലപ്പെടുത്തിയത്.
ഡിഐജി സന്ദീപ് പാട്ടീൽ, എസ്പി അങ്കിത് ഗോയൽ എന്നിവരുടെ മേൽനോട്ടത്തിൽ, അഡീഷണൽ എസ്പി മനീഷ് കൽവാനിയ, എസ്ഡിപിഒ ഭൗസാഹെബ് ധോലെ എന്നിവരുടെ നേതൃത്വത്തിലുള്ള ടീം നടത്തിയ നീക്കത്തിലാണ് മാവോയിസ്റ്റുകളെ കണ്ടെത്തിയത്. ഒരു മണിക്കൂറോളം കമാൻഡോകളും മാവോയിസ്റ്റുകളും തമ്മിൽ ഏറ്റുമുട്ടി. സംഭവസ്ഥലത്തുനിന്നും മാവോയിസ്റ്റുകളുടെ സാധനസാമഗ്രികളും മറ്റും കണ്ടെടുത്തിട്ടുണ്ട്. എൻകൗണ്ടറിൽ കൊല്ലപ്പെട്ട മാവോയിസ്റ്റുകൾ ആരൊക്കെയാണെന്ന് ഇതുവരെ തിരിച്ചറിയാൻ സാധിച്ചിട്ടില്ല.
