ബീഹാറില്‍ ജെഡിയുവിനെ മറി കടന്ന് ബിജെപി ഏറ്റവും വലിയ ഒറ്റകക്ഷിയാകുന്ന എന്ന സാഹചര്യത്തില്‍ ജെഡിയു നേതാവ് നിതീഷ് കുമാര്‍ തന്നെ ബീഹാര്‍ മുഖ്യമന്ത്രിയാകുമോ എന്ന ചോദ്യം പ്രസക്തമാണ്. മുന്നണിയിലെ രണ്ടാമത്തെ കക്ഷിയായാലും ബിജെപി പിന്തുണ ലഭിക്കുമെങ്കിലും നിതീഷ് ഇക്കാര്യത്തില്‍ സ്വീകരിക്കുന്ന നിലപാട് ഏറെ നിര്‍ണായകമാണ്.
ഇതിനിടയിലാണ് ബിഹാറിലെ പ്രമുഖ ബിജെപി നേതാവ് അശ്വനി ചൗബെയുടെ പ്രസ്താവന ശ്രദ്ധേയമാകുന്നത്. നിതീഷ് കുമാര്‍ കേന്ദ്രസര്‍ക്കാരില്‍ പങ്കാളിയാകണമെന്നാണ് അശ്വനി ചൗബ മുന്നോട്ട് വച്ച നിര്‍ദ്ദേശം. തെരഞ്ഞെടുക്കപ്പെട്ട ഒരാള്‍ മാത്രമേ മുഖ്യമന്ത്രിയാകാവു എന്നും അശ്വനി പറഞ്ഞു. നിതീഷ് കുമാര്‍ നിയമസഭ തെരഞ്ഞെടുപ്പില്‍ മത്സരിച്ചിട്ടില്ല എന്നതും ശ്രദ്ധേയമാണ്. മുഖ്യമന്ത്രി സ്ഥാനത്തേക്ക് നിതീഷ് കുമാര്‍ തന്നെ മറ്റൊരാളെ നിര്‍ദ്ദേശിക്കണമെന്നാണ് ബിജെപി നേതാവ് പറയുന്നത്.
നേരത്തെ എന്‍ഡിഎ സഖ്യകക്ഷിയായിരുന്ന എല്‍ജെപി നിതീഷ് കുമാറുമായുള്ള അസ്വാരസ്യത്തെ തുടര്‍ന്ന് മുന്നണി വിട്ട് തനിച്ച് തെരഞ്ഞെടുപ്പിനെ നേരിട്ടിരുന്നു. എന്നാല്‍ താന്‍ മോദിയുടെ ഹനുമാനാണ് എന്ന് പരസ്യമായി പറഞ്ഞാണ് എല്‍ജെപി നേതാവ് ചിരാഗ് പാസ്വാന്‍ പ്രചരണം നടത്തിയത്. വലിയ നേട്ടമാണ് എല്‍ജെപി തെരഞ്ഞെടുപ്പില്‍ നേടിയത്. ജെഡിയുവിനെതിരെ മത്സരിച്ച് എല്‍ജെപി ബിജെപിയെ പിന്തുണച്ചിരുന്നു.
ബിജെപിയെ ഏറ്റവും വലിയ ഒറ്റകക്ഷിയാക്കുന്നതില്‍ എല്‍ജെപിയ്ക്ക് വലിയ പങ്കുണ്ടെന്നാണ് വിലയിരുത്തല്‍. നിതീഷ് കുമാറിന് പകരം മറ്റൊരാള്‍ മുഖ്യമന്ത്രിയായാല്‍ എല്‍ജെപി എന്‍ഡിഎയിലേക്ക് തിരിച്ചെത്തുമെന്നും സൂചനയുണ്ട്. എന്നാല്‍ ഇക്കാര്യങ്ങളിലെല്ലാം നിതീഷ് കുമാറിന്റെ നിലപാടുകള്‍ ഏറെ നിര്‍ണായകമാണ്.
