കമ്പ്യൂട്ടറിലോ ലാപ്ടോപ്പിലോ ദിവസവും മണിക്കൂറുകളോളം ടൈപ്പ് ചെയ്യുന്നവരാണ് നമ്മളിൽ ഭൂരിഭാഗം പേരും. എന്നാൽ കീബോർഡിലെ ‘F’, ‘J’ എന്നീ രണ്ട് അക്ഷരങ്ങളുടെ കീകളിൽ നൽകിയിട്ടുള്ള ചെറിയ വരകളോ മുഴകളോ (Ridges/Bumps) നിങ്ങൾ ശ്രദ്ധിച്ചിട്ടുണ്ടോ? അത് വെറുമൊരു ഭംഗിക്കോ ഡിസൈനിന്റെ ഭാഗമായോ നൽകിയിട്ടുള്ളതല്ല. കീബോർഡിലേക്ക് നോക്കാതെ തന്നെ അതിവേഗത്തിലും കൃത്യതയോടെയും ടൈപ്പ് ചെയ്യാൻ സഹായിക്കുന്ന ഒരു വൻ സാങ്കേതിക വിദ്യയാണ് ഈ കുഞ്ഞു വരകൾക്ക് പിന്നിലുള്ളത്.
കീബോർഡിലേക്ക് നോക്കാതെ സ്‌ക്രീനിൽ മാത്രം ശ്രദ്ധിച്ച് ടൈപ്പ് ചെയ്യുന്ന ‘ടച്ച് ടൈപ്പിംഗ്’ (Touch Typing) രീതി എളുപ്പമാക്കാനാണ് ഈ വരകൾ നൽകിയിരിക്കുന്നത്. കമ്പ്യൂട്ടർ ടൈപ്പിംഗിൽ വിരലുകൾ വെക്കേണ്ട പ്രാഥമിക സ്ഥാനത്തെ ‘ഹോം റോ’ (Home Row) എന്നാണ് വിളിക്കുന്നത്. ഇടതുകൈയുടെ ചൂണ്ടുവിരൽ ‘F’ കീയിലും വലതുകൈയുടെ ചൂണ്ടുവിരൽ ‘J’ കീയിലുമാണ് വെക്കേണ്ടത്. കീബോർഡിലേക്ക് നോക്കാതെ തന്നെ വിരലുകൾ തൊട്ടുനോക്കി ഈ സ്ഥാനം കൃത്യമായി മനസ്സിലാക്കാൻ ഈ വരകൾ സഹായിക്കുന്നു.
2002 ഏപ്രിലിൽ ജൂൺ ഇ ബോബിഷ് (June E Botich) എന്ന വനിതയാണ് ടൈപ്പിംഗ് വേഗത വർദ്ധിപ്പിക്കുന്നതിനായി കീബോർഡുകളിലെ ഈ എർഗണോമിക് മാറ്റം രൂപകൽപ്പന ചെയ്ത് പേറ്റന്റ് നേടിയെടുത്തത്. ഇടതുകൈയിലെ വിരലുകൾ A, S, D, F കീകളിലും വലതുകൈയിലെ വിരലുകൾ J, K, L, ; കീകളിലും ക്രമീകരിച്ച് ടൈപ്പ് ചെയ്യുമ്പോൾ ഓരോ അക്ഷരത്തിലേക്കും വിരലുകൾ കൃത്യമായി എത്തുവാൻ ഈ വരകൾ സഹായിക്കും. ദിവസവും ഉപയോഗിക്കുന്ന കമ്പ്യൂട്ടറുകളിലെ ഈ ചെറിയ രഹസ്യം ഇപ്പോൾ ഇൻസ്റ്റാഗ്രാം അടക്കമുള്ള സോഷ്യൽ മീഡിയ പ്ലാറ്റ്‌ഫോമുകളിൽ വലിയ ചർച്ചയായി മാറിക്കഴിഞ്ഞു.
