ന്യൂഡൽഹി: ഫ്രഞ്ച് പ്രസിഡന്റ് ഇമ്മാനുവൽ മക്രോണിന് വധഭീഷണി. കുപ്രസിദ്ധ ഭീകരസംഘടനയായ ജയ്ഷ്-ഇ-മുഹമ്മദാണ് മക്രോണിനെതിരെ വധഭീഷണി മുഴക്കിയിരിക്കുന്നത്. പ്രവാചകന്റെ അഭിമാനം കാക്കാൻ വേണ്ടി ജീവത്യാഗം ചെയ്യാൻ തയ്യാറുള്ളവർ ഫ്രഞ്ച് പ്രസിഡന്റ് ഇമ്മാനുവൽ മക്രോണിനെയും സമാനചിന്താഗതിയുള്ളവരെയും ലക്ഷ്യമിടുന്നുവെന്ന് ഇന്ത്യൻ എക്സ്പ്രസ് പ്രസിദ്ധീകരിച്ച വാർത്തയിൽ പറയുന്നു.
ജയ്ഷ്-ഇ-മുഹമ്മദിന്റെ പ്രഖ്യാപനങ്ങൾ പ്രസിദ്ധീകരിക്കുന്ന അൽ-ഖലമെന്ന മാസികയുടെ വെബ്സൈറ്റിലാണ് ഇമ്മാനുവൽ മാക്രോണിനെ മതനിന്ദ ആരോപിച്ച് വധിക്കുമെന്ന് പ്രഖ്യാപിച്ചിട്ടുള്ളത്. ചാർലി ഹെബ്ദോ മാഗസിന് പിന്തുണ പ്രഖ്യാപിച്ച മക്രോണിന്റെ നടപടിയെ വെബ്സൈറ്റിലൂടെ ഭീകരസംഘടന നിശിതമായി വിമർശിച്ചിട്ടുണ്ട്.
നേരത്തെ, മാലിദ്വീപിൽ നടന്ന വ്യോമാക്രമണത്തിൽ ഫ്രാൻസ് 50 അൽഖ്വയ്ദ തീവ്രവാദികളെ വധിച്ചിരുന്നു. ഇതേ തുടർന്ന് അൽക്വയ്ദയും മക്രോണിനെ വധിക്കുമെന്ന് പരസ്യമായി പ്രഖ്യാപിച്ചിട്ടുണ്ട്.
