ന്യൂഡൽഹി: ഡൽഹി മുഖ്യമന്ത്രിയെ വീട്ടുതടങ്കലിലാക്കിയെന്ന വിവാദം അരവിന്ദ് കെജരിവാളിന്റെ നാടകമെന്ന് രൂക്ഷവിമർശനവുമായി ബിജെപി. കെജ്രിവാൾ വീട്ടുതടങ്കലിലല്ലെന്നും കഴിഞ്ഞ രാത്രിയിൽ വിവാഹ പാർട്ടിയിൽ പങ്കെടുത്തതിനാലാണ് വീട്ടിൽ വിശ്രമിക്കുന്നതെന്നും ബിജെപി പാർലമെന്റ് അംഗമായ മീനാക്ഷി ലേഖി ട്വീറ്റ് ചെയ്തു.
തിങ്കളാഴ്ച മുതൽ ഡൽഹി മുഖ്യമന്ത്രിയുടെ വീടിനു മുന്നിൽ പ്രതിഷേധം നടത്തുന്ന ബിജെപിയുടെ മേയർമാരെയും കൗൺസിലർമാരെയും കാണാതിരിക്കാനുള്ള കെജരിവാളിന്റെ നാടകമാണ് ഇതെന്ന് ബിജെപി ആരോപിച്ചു. നോർത്ത് ഡൽഹി, സൗത്ത് ഡൽഹി, ഈസ്റ്റ് ഡൽഹി മുനിസിപ്പൽ കോർപ്പറേഷനുകളിൽ ബിജെപിയാണ് ഭരിക്കുന്നത്. ഇവിടങ്ങളിലെ മേയർ മാരും കൗൺസിലർമാരും ഇന്നലെ മുതൽ അരവിന്ദ് കെജരിവാളിന്റെ വസതിക്കുമുന്നിൽ പ്രതിഷേധം നടത്തുകയാണ്.മുനിസിപ്പാലിറ്റികൾക്ക് സംസ്ഥാന സർക്കാർ നൽകാനുള്ള 13,000 കോടി രൂപയുടെ കുടിശ്ശിക തീർക്കണമെന്നാവശ്യപ്പെട്ടാണ് ഇവർ സമരം ചെയ്യുന്നത്.
മേയർമാരുടെ സംഘത്തിനൊപ്പം ഡൽഹി ബിജെപി വൈസ് പ്രസിഡണ്ട് ഹർഷ് മൽഹോത്രയും നിരവധി വനിതാ കൗൺസിലർമാരും അടങ്ങുന്ന സമരസംഘത്തിന്റെ കൂടെ ഐക്യദാർഢ്യം പ്രഖ്യാപിച്ചു കൊണ്ട് ഡൽഹി ബിജെപി അധ്യക്ഷൻ ആദേശ് ഗുപ്‌തയും എം.പിമാരായ മീനാക്ഷി ലേഖി, പർവേഷ് വർമ്മ തുടങ്ങിയവരും ചേർന്നിരുന്നു.
