ഇരുനൂറ് കടക്കാതെ ഓസീസ്; നിർണ്ണായക ലീഡ് നേടി ഇന്ത്യ

അഡ്ലെയ്ഡ്: ഇന്ത്യക്കെതിരായ ഒന്നാം ക്രിക്കറ്റ് ടെസ്റ്റിൽ ഓസ്ട്രേലിയ 191 റൺസിന് പുറത്ത്. ഒന്നാം ഇന്നിംഗ്സിൽ 53 റൺസിന്റെ നിർണ്ണായക ലീഡ് ഇന്ത്യ സ്വന്തമാക്കി.

ബൗളർമാർ പ്രകടിപ്പിച്ച മികച്ച പോരാട്ട വീര്യമാണ് ഇന്ത്യക്ക് ലീഡ് സമ്മാനിച്ചത്. സ്പിന്നർ രവിചന്ദ്രൻ അശ്വിൻ 4 വിക്കറ്റ് വീഴ്ത്തിയപ്പോൾ ഉമേഷ് യാദവ് 3ഉം ബൂമ്ര രണ്ടും വിക്കറ്റെടുത്തു. മുൻ നിര തകർന്നടിഞ്ഞപ്പോൾ 73 റൺസുമായി പുറത്താകാതെ നിന്ന ക്യാപ്റ്റൻ ടിം പെയ്നും 47 റൺസെടുത്ത് ലെബൂഷെയ്നും മാത്രമാണ് ഓസീസ് നിരയിൽ തിളങ്ങിയത്. സ്റ്റാർ ബാറ്റ്സ്മാൻ സ്റ്റീവ് സ്മിത്തിനെ അശ്വിൻ ഒരു റണ്ണിന് മടക്കിയത് ഓസീസിന് തിരിച്ചടിയായി. ഇന്ത്യൻ ഫീൽഡർമാർ ക്യാച്ചുകൾ കൈവിട്ടില്ലായിരുന്നുവെങ്കിൽ ഓസ്ട്രേലിയ ഇതിലും ചെറിയ സ്കോറിൽ ഒതുങ്ങുമായിരുന്നു.

നേരത്തെ ടോസ് നേടി ബാറ്റിംഗ് തിരഞ്ഞെടുത്ത ഇന്ത്യ ഒന്നാം ഇന്നിംഗ്സിൽ 244 റൺസെടുത്തു. നായകൻ വിരാട് കോഹ്ലി 74 റൺസെടുത്തു. ഓസ്ട്രേലിയക്ക് വേണ്ടി സ്റ്റാർക് 4ഉം കമ്മിൻസ് 3ഉം വിക്കറ്റെടുത്തു.