ഡല്ഹി: പുതിയ പാര്ലമെന്റ് മന്ദിരമുള്പ്പെടുന്ന ‘സെന്ട്രല് വിസ്ത’ പദ്ധതിയുമായി കേന്ദ്ര സര്ക്കാരിന് മുന്നോട്ടുപോകാമെന്ന് സുപ്രീംകോടതി. കടലാസ് ജോലികളുമായി മുന്നോട്ടുപോകാന് ഭൂരിപക്ഷ വിധിയില് കോടതി അംഗീകാരം നല്കി. പദ്ധതിക്കെതിരായ ഹര്ജികളില് ജസ്റ്റിസ് എ.എം. ഖാന്വില്കര് അധ്യക്ഷനായ ബെഞ്ചാണ് വിധിപറഞ്ഞത്.
പദ്ധതിയുടെ ശിലാസ്ഥാപനച്ചടങ്ങ് നടത്താന് സുപ്രീംകോടതി നേരത്തേ അനുമതി നല്കിയിരുന്നു. ഡിസംബര് പത്തിന് പ്രധാനമന്ത്രിയാണ് ശിലാസ്ഥാപനച്ചടങ്ങ് ഉദ്ഘാടനം ചെയ്തത്. രാഷ്ട്രപതിഭവന്മുതല് ഇന്ത്യാഗേറ്റ് വരെ നീളുന്ന മൂന്നുകിലോമീറ്റര് രാജ്പഥ് പാതയ്ക്കിരുവശത്തുമായി സമഗ്രമാറ്റം ലക്ഷ്യംവെക്കുന്ന കേന്ദ്ര സര്ക്കാരിന്റെ അഭിമാനപദ്ധതിക്കെതിരായ ഹര്ജികള് നവംബര് അഞ്ചിനാണ് സുപ്രീംകോടതി വിധിപറയാന് മാറ്റിയത്.
ഇപ്പോഴത്തെ പാര്ലമെന്റ് കെട്ടിടത്തിന് സൗകര്യവും സുരക്ഷയും സാങ്കേതികസംവിധാനങ്ങളും കുറവായതിനാല് പുതിയത് നിര്മിച്ചേ പറ്റൂവെന്ന് കേന്ദ്രം സുപ്രീംകോടതിയെ അറിയിച്ചിരുന്നു. ഇന്ത്യയുടെ 75-ാം സ്വാന്ത്ര്യദിനമാഘോഷിക്കുന്ന 2022-നു മുന്പായി പുതിയ മന്ദിര സമുച്ചയം നിര്മിക്കാനാണ് ലക്ഷ്യം. പാര്ലമെന്റും വിവിധ മന്ത്രാലയങ്ങളുമുള്പ്പെടുന്ന സെന്ട്രല് വിസ്ത പുതുക്കിപ്പണിയുന്ന 20,000 കോടിയുടെ പദ്ധതി ഉപേക്ഷിക്കണമെന്നുകാട്ടി 60 മുന് ഉദ്യോഗസ്ഥര് പ്രധാനമന്ത്രിക്ക് കത്തെഴുതിയിരുന്നു.
Discussion about this post