ന്യൂഡല്ഹി: രാജ്യമെമ്പാടും കോവിഡ് -19 വൈറസ് വാക്സിന് യഥാസമയം എത്തുമെന്നുറപ്പിക്കാന് വിപുലമായ ഗതാഗത ക്രമീകരണം ആവിഷ്കരിച്ച് കേന്ദ്ര സര്ക്കാര്. വ്യോമമാര്ഗം വാക്സിന് എത്തിക്കുകയെന്ന ദൗത്യത്തിനാണു രൂപം നല്കിയിരിക്കുന്നത്. ഇതിനായി യാത്രാവിമാനങ്ങളും ഉപയോഗിക്കും. ഇന്നു രണ്ടാമതു രാജ്യവ്യാപക വാക്സിന് ഡ്രൈ റണ് നിശ്ചയിച്ചിരിക്കെയാണു നീക്കം. ദൗത്യം മണിക്കൂറുകള്ക്കുള്ളില് ആരംഭിക്കുമെന്നു സര്ക്കാര്വൃത്തങ്ങള് അറിയിച്ചു.
വിതരണത്തിനു യാത്രാവിമാനങ്ങള് ഉപയോഗിക്കാനും അനുമതി നല്കി. പുനെയായിരിക്കും വാക്സിന് വിതരണത്തിന്റെ കേന്ദ്രഹബ്. പുനെയില്നിന്നു വാക്സില് മിനിഹബ്ബുകളിലെത്തിച്ചശേഷം വിവിധ കേന്ദ്രങ്ങള്ക്കു കൈമാറാനാണ് പദ്ധതി ആവിഷ്കരിച്ചിരിക്കുന്നത്. ഇതിനുപുറമേ 41 വിമാനത്താവളങ്ങള് മിനിഹബ്ബുകളായും തെരഞ്ഞെടുത്തിട്ടുണ്ട്. ഉത്തരേന്ത്യക്കു ഡല്ഹിയും കര്ണാലും കിഴക്കന് മേഖലയ്ക്കു കൊല്ക്കത്തയും ഗുവാഹത്തിയും ദക്ഷിണേന്ത്യയ്ക്കു ചെന്നൈയും ഹൈദരാബാദുമാകും മിനിഹബ്ബുകള്.
ഇന്നത്തെ ഡ്രൈ റണ്ണിനു മുന്നോടിയായി സംസ്ഥാന, കേന്ദ്രഭരണ പ്രദേശങ്ങളിലെ ആരോഗ്യമന്ത്രിമാരുമായി കേന്ദ്ര ആരോഗ്യമന്ത്രി ഡോ. ഹര്ഷ്വര്ധന് ആശയവിനിമയം നടത്തിയിരുന്നു. വാക്സിനെതിരായ പ്രചാരണങ്ങള്ക്കു തടയിടാന് ആവശ്യമായ നടപടി സ്വീകരിക്കണമെന്നു കേന്ദ്രമന്ത്രി സംസ്ഥാനങ്ങളോട് അഭ്യര്ഥിച്ചു.
Discussion about this post