കശ്മീരിനെ ഉടച്ചു വാർത്ത ഭരണ പരിഷ്കാരങ്ങൾ; ഭീകരാക്രമണങ്ങളും സൈന്യത്തിന് നേരെയുള്ള ആക്രമണങ്ങളും ഗണ്യമായി കുറഞ്ഞെന്ന് കണക്കുകൾ

ഡൽഹി: കേന്ദ്ര സർക്കാർ കൊണ്ടു വന്ന പുതിയ ഭരണ പരിഷ്കാരങ്ങൾ ജമ്മു കശ്മീരിൽ ഫലപ്രദമായ മാറ്റം കൊണ്ടു വന്നെന്ന് കണക്കുകൾ. കേന്ദ്ര ആഭ്യന്തര മന്ത്രാലയത്തിന്റെ കണക്കുകൾ പ്രകാരം മുൻ വർഷങ്ങളെ അപേക്ഷിച്ച് 2020ൽ ഭീകരാക്രമണങ്ങളുടെ എണ്ണത്തിൽ 60.93 ശതമാനം കുറവ് രേഖപ്പെടുത്തി. വീരമൃത്യു വരിക്കുന സൈനികരുടെ എണ്ണത്തിൽ 29.11 ശതമാനവും കൊല്ലപ്പെടുന്ന സാധാരണക്കാരുടെ എണ്ണത്തിൽ 14.28 ശതമാനവും കുറവ് രേഖപ്പെടുത്തി.

ജമ്മു കാശ്‌മീരിലും ലഡാക്കിലും കേന്ദ്രസർക്കാർ കൊണ്ടുവന്ന നിയമഭേദഗതികളാണ് ഈ മാറ്റങ്ങൾക്ക് കാരണമെന്ന് റിപ്പോർട്ടിൽ വ്യക്തമാക്കുന്നു. 2020 മാർച്ച് 31ന് ‘ദി ജമ്മു ആന്റ് കാശ്‌മീർ റിഓർഗനൈസേഷൻ ആക്‌ട്’ നിലവിൽ വന്നു. ഭേദഗതിയുമായി ബന്ധപ്പെട്ട് കാശ്‌മീരിൽ 48 കേന്ദ്രനിയമങ്ങളും 167 സംസ്ഥാന നിയമങ്ങളും നടപ്പിലാക്കി. ലഡാക്കിൽ 44 കേന്ദ്ര നിയമങ്ങളും 148 സംസ്ഥാന നിയമങ്ങളും കൊണ്ടു വന്നു.

പാക് അധീന കാശ്‌മീരിൽ നിന്ന് പലായനം ചെയ‌്തെത്തിയ ഇന്ത്യക്കാരായ അഭയാർത്ഥികൾക്ക് പ്രധാനമന്ത്രിയുടെ വികസന പാക്കേജിൽ നിന്ന് ഓരോ കുടുംബത്തിനും അഞ്ചര ലക്ഷം വീതം നൽകി. 36,384 കുടുംബങ്ങൾക്ക് ഇതിന്റെ പ്രയോജനം ലഭിച്ചതായി കേന്ദ്ര ആഭ്യന്തര മന്ത്രാലയത്തിന്റെ റിപ്പോർട്ടിൽ വ്യക്തമാകുന്നു. പടിഞ്ഞാറൻ പാകിസ്ഥാനിൽ നിന്നുള്ള അഭയാർത്ഥികൾക്കും ഈ ധനസഹായം ലഭ്യമാക്കി. 5764 കുടുംബങ്ങൾക്ക് ഇതിന്റെ പ്രയോജനം ലഭിച്ചു.