തിരുവനന്തപുരം: സി.എ.ജി റിപ്പോര്‍ട്ട് നിയമസഭയില്‍ വെച്ചതോടെ സംസ്ഥാന സര്‍ക്കാരിന്റെയും ധനമന്ത്രിയുടേയും ഭരണഘടനാവിരുദ്ധമായ സമീപനം വ്യക്തമായതായി ബി.ജെ.പി സംസ്ഥാന അധ്യക്ഷന്‍ കെ.സുരേന്ദ്രന്‍. കള്ളക്കളി മറയ്ക്കാന്‍ ഒരു മുഴം മുമ്പെ റിപ്പോര്‍ട്ട് ചോര്‍ത്തിയ ധനമന്ത്രിക്ക് മന്ത്രിസഭയില്‍ തുടരാന്‍ അര്‍ഹതയില്ലെന്നും അദ്ദേഹം പ്രസ്താവനയില്‍ പറഞ്ഞു.
സി.എ.ജി റിപ്പോര്‍ട്ട് ചോര്‍ത്തിയെടുത്ത് പുറത്ത് നല്‍കിയത് സത്യപ്രതിജ്ഞാ ലംഘനമാണ്. സി.എ.ജി റിപ്പോര്‍ട്ട് സഭയുടെ മേശപ്പുറത്ത് വെക്കുമ്പോള്‍ ധനമന്ത്രിയുടെ പ്രസ്താവനക്ക് എന്ത് പ്രസക്തിയാണുള്ളത്. സര്‍ക്കാര്‍ സി.എ.ജി റിപ്പോര്‍ട്ടിന്റെ അന്തസ് കളഞ്ഞു കുളിച്ചു. കിഫ്ബിയിലെ കടമെടുപ്പ് സംസ്ഥാന സര്‍ക്കാരിന്റെ ബാധ്യത ആയി മാറുമെന്ന് ബി.ജെ.പി നല്‍കിയ മുന്നറിയിപ്പ് റിപ്പോര്‍ട്ടിലും പറയുന്നു. കിഫ്ബി വഴിയുള്ള വായ്പ എടുക്കല്‍ ഭരണഘടനാവിരുദ്ധമാണെന്ന് സി.എ.ജി കണ്ടെത്തിയത് ഐസക്കിന്റെ മുഖത്തേറ്റ പ്രഹരമാണെന്നും സുരേന്ദ്രന്‍ പറഞ്ഞു.
നികുതിപണം കൊള്ളയടിക്കാനുള്ള നീക്കം സി.എ.ജി എതിര്‍ക്കുമെന്ന് മനസിലായതു കൊണ്ടാണ് സി.പി.എം സി.എ.ജിക്കെതിരെ പ്രചരണം നടത്തിയത്. മസാല ബോണ്ട് കേന്ദ്രസര്‍ക്കാരിന്റെ അധികാരത്തിലുള്ള കടന്നുകയറ്റമാണെന്ന റിപ്പോര്‍ട്ട് ഗൗരവതരമാണ്. ഫെഡറല്‍ വ്യവസ്ഥിതി തകര്‍ക്കാനാണ് തോമസ് ഐസക്ക് ശ്രമിക്കുന്നത്. മടിയില്‍ കനമുള്ളതു കൊണ്ടാണ് പിണറായി സര്‍ക്കാര്‍ ഓഡിറ്റിംഗിനെ ഭയക്കുന്നത്. വടക്കാഞ്ചേരി ലൈഫ് പദ്ധതിയിലും ഓഡിറ്റിംഗ് ഒഴിവാക്കാനാണ് സര്‍ക്കാര്‍ ശ്രമിച്ചതെന്നും സുരേന്ദ്രന്‍ വ്യക്തമാക്കി.
Discussion about this post