ഡൽഹി: പ്രധാനമന്ത്രി ഗ്രാമീണ ഭവന പദ്ധതിയുടെ ഭാഗമായി വീട് വെക്കാൻ ആറ് ലക്ഷം ഗ്രാമീണർക്ക് 2,691 കോടി രൂപ വിതരണം ചെയ്ത് പ്രധാനമന്ത്രി നരേന്ദ്ര മോദി. ഉത്തർ പ്രദേശിലെ പദ്ധതി ഗുണഭോക്താക്കൾക്കാണ് പ്രധാനമന്ത്രി ധനസഹായം വിതരണം ചെയ്തത്. വീഡിയോ കോൺഫറൻസിംഗ് വഴിയായിരുന്നു അദ്ദേഹം ജനങ്ങളോട് സംവദിച്ചത്.
മുൻ സർക്കാരുകൾ പാവങ്ങളെ ഭവന പദ്ധതികളുടെ പേരിൽ കബളിപ്പിക്കുകയായിരുന്നെന്ന് പ്രധാനമന്ത്രി പറഞ്ഞു. എന്നാൽ പ്രധാനമന്ത്രി ആവാസ് യോജന വഴി നിർമ്മിക്കുന്ന ഭവനങ്ങൾ ആരുടെ മുന്നിലും അഭിമാനത്തോടെ പ്രദർശിപ്പിക്കാൻ തക്ക തരത്തിലുള്ളവയാണെന്ന് അദ്ദേഹം അഭിപ്രായപ്പെട്ടു.
കഴിഞ്ഞ കുറച്ച് വർഷങ്ങൾ കൊണ്ട് ഗ്രാമീണ മേഖലകളിൽ മാത്രം 2 കോടി വീടുകൾ നിർമ്മിക്കാൻ സാധിച്ചു. ഇതിനായി കേന്ദ്ര സർക്കാർ ഒന്നര ലക്ഷം കോടി രൂപ ചെലവഴിച്ചതായും പ്രധാനമന്ത്രി വ്യക്തമാക്കി. കേന്ദ്ര ഗ്രാമ വികസന വകുപ്പ് മന്ത്രി നരേന്ദ്ര സിംഗ് തോമർ, ഉത്തർ പ്രദേശ് മുഖ്യമന്ത്രി യോഗി ആദിത്യനാഥ് തുടങ്ങിയവർ ചടങ്ങിൽ പങ്കെടുത്തു.
എല്ലാവർക്കും വീട് എന്ന ലക്ഷ്യം മുൻനിർത്തി 2016 നവംബർ 20ന് പ്രധാനമന്ത്രി നരേന്ദ്ര മോദി പ്രഖ്യാപിച്ച പദ്ധതിയാണ് പ്രധാനമന്ത്രി ആവാസ് യോജന. പ്രധാനമന്ത്രി ഉജ്ജ്വല പദ്ധതി പ്രകാരമുള്ള സൗജന്യ പാചക വാതക വിതരണം, സൗജന്യം വൈദ്യുതീകരണം, ജല ജീവൻ പദ്ധതി പ്രകാരമുള്ള സൗജന്യ കുടിവെള്ള വിതരണം എന്നിവയും പദ്ധതി പ്രകാരം നടപ്പിലാക്കുന്നു.
Discussion about this post