കൊല്‍ക്കത്ത: തെരഞ്ഞെടുപ്പ് നടക്കാനിരിക്കേ ബംഗാള്‍ മുഖ്യമന്ത്രി മമത ബാനര്‍ജിയെ വെട്ടിലാക്കി മന്ത്രിസഭയില്‍നിന്ന് വീണ്ടും രാജി. വനംവകുപ്പ് മന്ത്രി രജീബ് ബാനര്‍ജിയാണ് രാജിക്കത്ത് കൈമാറിയത്.
ഇദ്ദേഹം ബി.ജെ.പിയില്‍ ചേര്‍ന്നേക്കുമെന്നാണ് വിവരം. കഴിഞ്ഞ ഡിസംബറില്‍ മമത വിളിച്ചുചേര്‍ത്ത കാബിനറ്റ് യോഗത്തില്‍ രജീബ് ബാനര്‍ജി പെങ്കടുത്തിരുന്നില്ല. കാബിനറ്റ് യോഗത്തില്‍നിന്ന് വിട്ടുനില്‍ക്കുന്ന കാര്യം മുന്‍കൂട്ടി അറിയിക്കുകയും ചെയ്തിരുന്നില്ല. ഇതോടെ രജീബ് ബാനര്‍ജി ബി.ജെ.പിയില്‍ ചേര്‍ന്നേക്കുമെന്ന അഭ്യൂഹങ്ങള്‍ വന്‍തോതില്‍ പ്രചരിച്ചിരുന്നു.
പശ്ചിമ ബംഗാളിലെ ജനങ്ങളെ സേവിക്കുന്നത് വളരെ വളരെ അംഗീകാരമാണ്. ഈ അവസരം ലഭിച്ചതിന് ഞാന്‍ നന്ദി പറയുന്നുവെന്ന് രജീബ് കൈമാറിയ രാജിക്കത്തില്‍ പറയുന്നു.
അതേമയം തെരഞ്ഞെടുപ്പ് അടുത്ത പശ്ചാത്തലത്തില്‍ തൃണമൂലില്‍നിന്ന് കൂടുതല്‍ നേതാക്കളെ പാര്‍ട്ടിയിലെത്തിക്കാനാണ് ബി.ജെ.പിയുടെ നീക്കം. സുവേന്ദു അധികാരി ഉള്‍പ്പെടെ നിരവധി നേതാക്കള്‍ ബി.ജെ.പി പാളയത്തിലെത്തിയിരുന്നു.
തെരഞ്ഞെടുപ്പിന് ഇനി മാസങ്ങള്‍ മാത്രം ശേഷിക്കേ, തൃണമൂല്‍ കോണ്‍ഗ്രസും ബിജെപിയും തമ്മിലുള്ള പോര് മുറുകുന്നതിനിടെയാണ് മറ്റൊരു മന്ത്രി കൂടി രാജിവെച്ചത്. രാജിവ് ബാനര്‍ജിയുടെ അടുത്ത നീക്കം സംബന്ധിച്ച്‌ മനസ് തുറന്നിട്ടില്ല.
