ഡൽഹി: കർഷക സമരത്തിന്റെ പേരിൽ റിപ്പബ്ലിക് ദിനത്തിൽ ഡൽഹിയിൽ നടന്ന അക്രമങ്ങളിൽ കർശന നടപടി ആരംഭിച്ച് കേന്ദ്ര സർക്കാർ. പഞ്ചാബി നടൻ ദീപ് സിദ്ദുവിനൊപ്പം കുപ്രസിദ്ധ അധോലോക നായകൻ ലക്ക സദാനക്കെതിരെയും ഡൽഹി പൊലീസ് കേസെടുത്തു. ഇരുവർക്കും അക്രമങ്ങളിൽ നേരിട്ട് പങ്കുള്ളതായി പൊലീസ് അറിയിച്ചു.
അതേസമയം റിപ്പബ്ലിക് ദിനത്തിൽ അക്രമം അഴിച്ചു വിട്ടവർക്കെതിരെ പൊലീസ് കർശന നടപടി ആരംഭിച്ചു. അക്രമം നടത്തിയവർക്കും പൊതുമുതൽ നശിപ്പിച്ചവർക്കുമെതിരെ ശക്തമായ നടപടിയെടുക്കാൻ കേന്ദ്ര ആഭ്യന്തര മന്ത്രാലയം നിർദ്ദേശം നൽകി. അക്രമ സംഭവങ്ങളുമായി ബന്ധപ്പെട്ട് ചോദ്യം ചെയ്യലിന് ഹാജരാകാൻ സംയുക്ത കിസാൻ മോർച്ച നേതാവ് ദർശൻ പാലിന് പൊലീസ് നോട്ടീസ് നൽകി. സമരവേദികൾക്കരികെ പൊലീസ് സന്നാഹം ശക്തമാക്കി.
അക്രമങ്ങളുമായി ബന്ധപ്പെട്ട് മേധാ പട്കർ ഉൾപ്പെടെ 37 നേതാക്കൾക്കെതിരെ പൊലീസ് കേസെടുത്തു. അക്രമ സംഭവങ്ങളുമായി ബന്ധപ്പെട്ട് ഡൽഹി പൊലീസ് രജിസ്റ്റർ ചെയ്ത ഇരുപത്തിയഞ്ച് ക്രിമിനൽ കേസുകളിൽ പത്തൊൻപത് പേരെ ഇതിനോടകം അറസ്റ്റ് ചെയ്തു കഴിഞ്ഞു.
Discussion about this post