പറവൂര്‍: പറവൂര്‍ താലൂക്ക് ആശുപത്രിയില്‍ യുവാക്കള്‍ ഭീകരാന്തരീക്ഷം സൃഷ്ടിച്ചു. മൂന്നംഗ സംഘം പരസ്പരം ഏറ്റുമുട്ടി അത്യാഹിത വിഭാഗം അടിച്ചുതകര്‍ത്തു. കാബിനും ഉപകരണങ്ങളും നശിപ്പിച്ചു. പൊലീസ് എത്തിയാണ് ഇവരെ നിയന്ത്രിച്ചത്. സംഭവത്തില്‍ പ്രതി കെടാമംഗലം സ്വദേശി അഖിലിനെ പിടികൂടി. സുഹൃത്തുക്കളായ മറ്റ് രണ്ടുപേര്‍ ഓടിമറഞ്ഞു.
അഖിലിന്റെ കൈവിരലില്‍ ആഴത്തില്‍ മുറിവുണ്ടായി ആശുപത്രിയില്‍ എത്തിയതായിരുന്നു. മുറിവ് തുന്നിക്കെട്ടണമെന്ന് ഡ്യൂട്ടി ഡോക്ടര്‍ അറിയിച്ചപ്പോള്‍ വിസമ്മതം പ്രകടിപ്പിച്ച്‌ പുറത്തേക്കിറങ്ങി. സുഹൃത്തുക്കളില്‍ ഒരാള്‍ തടഞ്ഞു. തുടര്‍ന്ന് സുഹൃത്തിനെ അഖില്‍ മര്‍ദിച്ചു. പിടിച്ചുമാറ്റാന്‍ ചെന്ന സുഹൃത്തിനെയും മര്‍ദിച്ചു. തുടര്‍ന്ന് കൂട്ടത്തല്ല് നടക്കുകയായിരുന്നു. ശനിയാഴ്ച പുലര്‍ച്ച മൂന്നരയോടെയാണ് സംഭവം.
രണ്ടുലക്ഷം രൂപയുടെ നഷ്ടമുണ്ടായതായി കണക്കാക്കുന്നു. ശനിയാഴ്ച ഉച്ചവരെ ഒ.പി പ്രവര്‍ത്തിച്ചില്ല. കലക്ടര്‍ എത്തി ഡോക്ടര്‍മാര്‍ക്കും ജീവനക്കാര്‍ക്കും സംരക്ഷണം ഉറപ്പുനല്‍കിയതിനെത്തുടര്‍ന്ന് 12.30ഓടെയാണ് പ്രവര്‍ത്തനമാരംഭിച്ചത്. പൊലീസ് എയിഡ്പോസ്റ്റ് സ്ഥാപിക്കണമെന്ന് സൂപ്രണ്ട് ഡോ. പി.എസ്. റോസമ്മ കലക്ടറോട് ആവശ്യപ്പെട്ടു.
