റോത്തക്ക്: ഓടുന്ന തീവണ്ടിക്കടിയിൽ പെട്ടിട്ടും പരിക്കേൽക്കാതെ രക്ഷപ്പെടുന്ന യുവതിയുടെ വീഡിയോ സാമൂഹിക മാദ്ധ്യമങ്ങളിൽ വൈറൽ ആകുന്നു. ഹരിയാനയിലെ റോത്തക്ക് പട്ടണത്തിലാണ് സംഭവം.
മരണത്തിൽ നിന്നും തലനാരിഴയ്ക്കാണ് യുവതി രക്ഷപ്പെടുന്നത്. സിഗ്നൽ കാത്ത് കിടന്ന ഗുഡ്സ് ട്രെയിന് മുന്നിലൂടെ പാളം മുറിച്ചു കടക്കാൻ ശ്രമിച്ച യുവതിയാണ് മരണത്തെ മുഖാമുഖം കണ്ടത്. പാളത്തിൽ വീണു പോയ യുവതി നെടുകെ നീണ്ടു നിവർന്നു കിടന്നു. ഇവർക്ക് മുകളിലൂടെ തീവണ്ടി സാവധാനം കടന്ന് പോയി. തീവണ്ടി കടന്ന് പോകുന്നത് വരെ നിശ്ചലയായി മനസാന്നിദ്ധ്യത്തോടെ കിടന്നതാണ് യുവതിക്ക് രക്ഷയായത്.
#WATCH | A woman saved her life by lying down on a railway track in Haryana's Rohtak after she got trapped beneath a moving train. The train was earlier on standby, awaiting a signal. She allegedly tried to cross it by going under when the train began to move suddenly (17.02) pic.twitter.com/kkuY1jtihm
— ANI (@ANI) February 18, 2021
നീങ്ങുന്ന ബോഗികൾക്കും പാളത്തിനും താഴെ യുവതി കിടക്കുന്നത് കണ്ട കാഴ്ചക്കാർ സംഭവം വീഡിയോയിൽ പകർത്തി. അനങ്ങാതെ കിടക്കാൻ കണ്ടു നിന്നവർ പറയുന്നതും വീഡിയോയിൽ കാണാം. തീവണ്ടി പോയി കഴിഞ്ഞപ്പോൾ കണ്ടു നിന്നവരിൽ ഒരാൾ പാളത്തിൽ കടന്ന് യുവതിയെ എഴുന്നേൽപ്പിക്കുന്നതും ഒരു പോറൽ പോലും ഏൽക്കാതെ ആശ്വാസത്തോടെ അവർ നടന്ന് പോകുന്നതും വീഡിയോയിൽ കാണാം.
