തിരുവനന്തപുരം: സ്വര്ണക്കടത്ത് കേസില് കോടിയേരി ബാലകൃഷ്ണന്റെ ഭാര്യ വിനോദിനിക്ക് മൂന്നാമതും കസ്റ്റംസ് നോട്ടീസ്. ഈ മാസം 30 ന് ഹാജരാകണം എന്നാണ് നിര്ദ്ദേശം. കഴിഞ്ഞ രണ്ട് നോട്ടീസിലും വിനോദിനി ഹാജരായില്ല. 30 നും ഹാജരായില്ലെങ്കില് കോടതി വഴി വാറന്റ് അയക്കുമെന്നാണ് കസ്റ്റംസ് നോട്ടീസ് വ്യക്തമാക്കിയിരിക്കുന്നത്. കള്ളക്കടത്തുമായി ബന്ധപ്പെട്ട ഡോളര് കടത്ത് കേസിലാണ് വിനോദിനിക്ക് നോട്ടീസ് അയച്ചിരിക്കുന്നത്.
ലൈഫ് മിഷന് പദ്ധതിയുടെ കോഴയായി യൂണിടാക് ഉടമ സന്തോഷ് ഈപ്പന് നല്കിയ ഐ ഫോണുകളില് ഒന്ന് വിനോദിനി ഉപയോഗിച്ചതായി കസ്റ്റംസ് കണ്ടെത്തിയിരുന്നു. യുഎഇ കോണ്സുല് ജനറലിന് നല്കിയ ഐഫോണ് എങ്ങനെ വിനോദിനി ബാലകൃഷ്ണന്റെ കയ്യില് എത്തിയെന്ന് കസ്റ്റംസ് പരിശോധിക്കുകയാണ്.
1.13 ലക്ഷം രൂപ വില വരുന്ന ഐഫോണാണ് വിനോദിനി ഉപയോഗിച്ചത്. സന്തോഷ് ഈപ്പന് വാങ്ങി നല്കിയ ഐഫോണുകളില് ഏറ്റവും വില കൂടിയ ഫോണായിരുന്നു ഇത്.സ്വര്ണക്കടത്ത് കേസ് വാര്ത്തയായതിന് പിന്നാലെ ഈ ഫോണ് സ്വിച്ച് ഓഫായെങ്കിലും IMEI നമ്പര് ഉപയോഗിച്ച് കസ്റ്റംസ് സിം കാര്ഡും അതുപയോഗിച്ച ആളേയും കണ്ടെത്തിയതെന്നാണ് സൂചന. നേരത്തെ തന്നെ ഈ ഐഫോണിനെ ചൊല്ലി വലിയ വിവാദങ്ങള് ഉണ്ടായിരുന്നു. ഡോളര് കടത്തിലും സ്വര്ണക്കടത്തിലും ലൈഫ് മിഷനിലും ഇടപെട്ടതിന് സ്വപ്നയ്ക്ക് കൈക്കൂലി എന്ന നിലയിലാണ് സന്തോഷ് ഈപ്പന് ഐഫോണുകള് വാങ്ങി നല്കിയത് എന്നാണ് കേന്ദ്ര ഏജന്സികളുടെ കണ്ടെത്തല്.
Discussion about this post