തിരുവനന്തപുരം: കായംകുളം മണ്ഡലത്തിലെ യു.ഡി.എഫ് സ്ഥാനാര്ത്ഥി അരിതാ ബാബുവിനെ അധിക്ഷേപിച്ച എ.എം ആരീഫ് എം.പി പ്രസ്താവന പിന്വലിച്ച് മാപ്പ് പറയണമെന്ന് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. കായംകുളത്ത് നടന്ന വനിതാ സംഗമത്തില് പ്രസംഗിച്ചപ്പോഴായിരുന്നു ആരിഫിന്റെ വിവാദ പരാമര്ശം. പാല് സൊസൈറ്റിയിലേക്കുള്ള തെരഞ്ഞെടുപ്പല്ല കേരള നിയമസഭയിലേക്കുള്ള തെരഞ്ഞെടുപ്പാണെന്ന് യു.ഡി.എഫ് ഓര്ക്കണമെന്നാണ് ആരിഫ് എല്.ഡി.എഫ് പൊതുയോഗത്തില് പ്രസംഗിച്ചത്. പ്രാരാബ്ധമാണ് മാനദണ്ഡമെങ്കില് പറയണമെന്നും ആരിഫ് ആവശ്യപ്പെട്ടു. പരാമര്ശം അധിക്ഷേപകരമാണെന്ന് ചൂണ്ടിക്കാട്ടി യു.ഡി.എഫ് കേന്ദ്രങ്ങള് വിഡിയോ പ്രചരിപ്പിക്കുന്നുണ്ട്.
”അരിതാ ബാബു മത്സരിക്കുന്നത് പാല് സൊസൈറ്റിയില് അല്ലെന്ന എം.പിയുടെ പരാമര്ശം വിലകുറഞ്ഞതാണ്. പാല് വിറ്റ് ജീവിക്കുന്ന അരിതയെ അധിക്ഷേപിക്കുന്നതിന് തുല്യമാണ് ഈ പരാമര്ശം. ഇതിന് കായംകുളം ജനത തക്കമറുപടി നല്കും. എം.പിയുടെ പരാമര്ശം സ്വന്തം സ്ഥാനത്തിന് ചേരാത്തതാണ്. അതിനെ ശക്തമായി അപലപിക്കുന്നു”. ചെന്നിത്തല പ്രസ്താവനയില് പറഞ്ഞു.
എ എം ആരിഫ് എംപിയുടെ പരിഹാസം വിഷമമുണ്ടാക്കിയെന്നും, തൊഴിലാളി വര്ഗത്തെയാണ് ആരിഫ് അപമാനിച്ചതെന്നും, ആരിഫിനെതിരെ നിയമ നടപടി സ്വീകരിക്കുമെന്നും കായംകുളത്തെ യുഡിഎഫ് സ്ഥാനാര്ഥി അരിത ബാബു പറഞ്ഞു. ആലപ്പുഴ ജില്ല പഞ്ചായത്ത് മുന് അംഗമായ അരിത ബാബു സംസ്ഥാനത്തെ ഏറ്റവും പ്രായം വനിത കുറഞ്ഞ സ്ഥാനാര്ഥിയാണ്. കായംകുളത്തെ സിറ്റിങ് എം.എല്.എ യു.പ്രതിഭയോടാണ് അരിത പോരിനിറങ്ങുന്നത്.
Discussion about this post