ആഗോളതലത്തിൽ പ്രതിസന്ധികൾ കനക്കുമ്പോഴും ഇന്ത്യ കൈവരിക്കുന്ന വികസന മുന്നേറ്റം സമാനതകളില്ലാത്തതാണെന്നും ലോകത്തിന് മുന്നിൽ രാജ്യം പുതിയൊരു വികസന മാതൃകയാണ് കാഴ്ചവെക്കുന്നതെന്നും പ്രധാനമന്ത്രി നരേന്ദ്ര മോദി. മൂന്ന് രാജ്യങ്ങളിലേക്കുള്ള ഔദ്യോഗിക സന്ദർശനത്തിന്റെ അവസാന ഘട്ടമായി ന്യൂസിലൻഡിലെ ഓക്ക്ലൻഡിൽ എത്തിയ അദ്ദേഹം, ഇന്ത്യൻ സമൂഹം ഒരുക്കിയ ‘കിയ ഓറ മോദി’ (Kia Ora Modi) സ്വീകരണ പരിപാടിയിൽ സംസാരിക്കുകയായിരുന്നു. 40 വർഷത്തിന് ശേഷമാണ് ഒരു ഇന്ത്യൻ പ്രധാനമന്ത്രി ന്യൂസിലൻഡ് സന്ദർശിക്കുന്നത് എന്ന പ്രത്യേകതയും ഈ യാത്രയ്ക്കുണ്ട്. ന്യൂസിലൻഡ് പ്രധാനമന്ത്രി ക്രിസ്റ്റഫർ ലക്സനും ചടങ്ങിൽ പങ്കെടുത്തു.
സഹവർത്തിത്വത്തിന്റെയും പങ്കുവെക്കപ്പെട്ട മൂല്യങ്ങളുടെയും പരസ്പര പ്രതിബദ്ധതയുടെയും ശക്തമായ അടിത്തറയിലാണ് ഇന്ത്യ-ന്യൂസിലൻഡ് ബന്ധം കെട്ടിപ്പടുത്തിരിക്കുന്നതെന്ന് പ്രധാനമന്ത്രി പറഞ്ഞു. ലോകത്തിലെ ഏറ്റവും വേഗത്തിൽ വളരുന്ന വലിയ സമ്പദ്വ്യവസ്ഥയായി ഇന്ത്യ മാറിയിരിക്കുകയാണ്. ഡിജിറ്റൽ ഇടപാടുകളിൽ രാജ്യം കൈവരിച്ച വിപ്ലവം ഇതിന് തെളിവാണ്. പ്രതിമാസം കോടിക്കണക്കിന് ഡിജിറ്റൽ ഇടപാടുകളാണ് യുപിഐ (UPI) വഴി ഇന്ത്യയിൽ നടക്കുന്നത്. ഡ്രോൺ സാങ്കേതികവിദ്യയിലും ബഹിരാകാശ സമ്പദ്വ്യവസ്ഥയിലും ഇന്ത്യ പുതിയ ഉയരങ്ങൾ തൊടുകയാണെന്നും അദ്ദേഹം കൂട്ടിച്ചേർത്തു. സദസ്സിൽ നിന്ന് ഉയർന്ന ‘മോദി മോദി’ വിളികൾക്കും ആചാരപരമായ സ്വീകരണങ്ങൾക്കും ഇടയിലായിരുന്നു പ്രധാനമന്ത്രിയുടെ പ്രസംഗം.
ഇരു രാജ്യങ്ങളുടെയും ഭാവി പരസ്പരം കൈകോർത്തുള്ളതാണെന്ന് വ്യക്തമാക്കിയ പ്രധാനമന്ത്രി, പുതുതായി ഒപ്പുവെക്കുന്ന ഉഭയകക്ഷി വ്യാപാര കരാർ ഇന്ത്യയെ ഒരു വികസിത രാഷ്ട്രമാക്കാനുള്ള യാത്രയ്ക്ക് പുതിയ വേഗത നൽകുമെന്നും ഇരുരാജ്യങ്ങളിലെയും ബിസിനസ് മേഖലകൾക്ക് ഇത് വൻ അവസരങ്ങൾ തുറന്നുനൽകുമെന്നും പ്രത്യാശ പ്രകടിപ്പിച്ചു. അതേസമയം, ചടങ്ങിൽ പ്രധാനമന്ത്രി പങ്കുവെച്ച ഒരു പഴയകാല ഓർമ്മ പ്രവാസികൾക്കിടയിൽ വലിയ ആവേശമായി. താൻ പൊതുരംഗത്തേക്ക് സജീവമായി കടന്നുവരുന്നതിന് മുൻപ്, അതായത് ഏകദേശം 25-30 വർഷങ്ങൾക്ക് മുൻപ് ന്യൂസിലൻഡ് സന്ദർശിച്ചപ്പോൾ സമ്മാനമായി ലഭിച്ച ഒരു മഫ്ലർ അദ്ദേഹം സദസ്സിനെ കാണിച്ചു. പതിറ്റാണ്ടുകൾ കഴിഞ്ഞിട്ടും സൂക്ഷിച്ചുവെച്ച ആ സമ്മാനം കാണിച്ചപ്പോൾ നിറഞ്ഞ കയ്യടികളോടെയാണ് പ്രവാസി സമൂഹം അതിനെ വരവേറ്റത്. വെള്ളിയാഴ്ച ഓക്ക്ലൻഡിൽ എത്തിയ പ്രധാനമന്ത്രിക്ക് പരമ്പരാഗത മാവോറി ആചാരപ്രകാരമുള്ള ഊഷ്മളമായ സ്വീകരണമാണ് ന്യൂസിലൻഡ് ഭരണകൂടം ഒരുക്കിയത്.
