ഇന്ത്യയിൽ നിന്നുള്ളവർക്ക് പ്രവേശന വിലക്ക് ഏർപ്പെടുത്തി ഇറ്റലിയും

റോം: ഇന്ത്യയിൽ കോവിഡ് വ്യാപനം അതിരൂക്ഷമായ സാഹചര്യത്തിൽ ഇന്ത്യയിൽ നിന്നുള്ളവർക്ക് പ്രവേശന വിലക്ക് ഏർപ്പെടുത്തിയ രാജ്യങ്ങളുടെ പട്ടികയിൽ ഇറ്റലിയും. കഴിഞ്ഞ 14 ദിവസമായി ഇന്ത്യയിൽ തുടരുന്നവർക്ക് ഇറ്റലിയിൽ പ്രവേശിക്കുന്നതിൽ വിലക്ക് ഏർപ്പെടുത്തിയ ഉത്തരവിൽ ഒപ്പിട്ടെന്ന് ഇറ്റലിയുടെ ആരോഗ്യമന്ത്രി റോബേർട്ടോ സ്പെറാൻസാ ട്വിറ്ററിലൂടെ അറിയിച്ചു

ഇന്ത്യയിൽനിന്നു വരുന്ന ഇറ്റലി പൗരന്മാർക്ക് കോവിഡ് നെഗറ്റീവ് സർട്ടിഫിക്കറ്റ് ഉണ്ടെങ്കിൽ രാജ്യത്തേക്ക് പ്രവേശിക്കാമെന്നും, ഇറ്റലിയിലെത്തിയാൽ ക്വാറന്റീനിൽ പോകണമെന്നും മന്ത്രി നിർദേശിച്ചു.

കടുത്ത ആരോഗ്യ പ്രതിസന്ധി നേരിടുന്ന ഇന്ത്യ, കോവിഡിന്റെ ഇരട്ട വകഭേദത്തിനെതിരെയുള്ള പോരാട്ടത്തിലാണ്. ഞായറാഴ്ച ഇന്ത്യയിൽ റിപ്പോർട്ട് ചെയ്ത പ്രതിദിന കോവിഡ് കേസ് ലോകത്ത് റിപ്പോർട്ട് ചെയ്യുന്ന ഏറ്റവും ഉയർന്നതാണ്. തുടർച്ചയായ നാലാം ദിവസമാണ് ഇത്തരത്തിൽ റിപ്പോർട്ട് ചെയ്യുന്നത്