ബാലി: പരിശീലനത്തിനിടെ ബാലി തീരത്തുനിന്ന് മാറി മുങ്ങിപ്പോയ മുങ്ങിക്കപ്പല്‍ മൂന്നുഭാഗങ്ങളായി പിളര്‍ന്ന് അടിത്തട്ടില്‍ നിലംപറ്റി കിടക്കുന്നു. ബാലിയുടെ തീരത്തുനിന്നും 100 കിലോമീറ്റര്‍ അകലെയാണ് സമുദ്രത്തില്‍ മുങ്ങിപ്പോയ കെ ആര്‍ ഐ നംഗാല-402 എന്ന അന്തര്‍വാഹിനി മൂന്ന് കഷണങ്ങളായി തകര്‍ന്ന് 2600 അടി താഴ്ചയില്‍ കണ്ടെത്തിയത്.
വെള്ളത്തിനടിയില്‍ സ്‌ഫോടക ബോംബ് പരീക്ഷിക്കുന്നതിനിടയിലാണ് 53 ജീവനക്കാരുമായി യാത്രതിരിച്ച കപ്പല്‍ ബുധനാഴ്ച കാണാതായത്. മുഴുവന്‍ ജീവനക്കാരും മരണപ്പെട്ടതായി ഇന്‍ഡോനേഷ്യന്‍ സൈന്യം ഔദ്യോഗികമായി അറിയിച്ചു.
കപ്പല്‍ 2600 അടി താഴ്ചയിലുള്ളതിന്റെ സൂചനകള്‍ ഞായറാഴ്ച രാവിലെയാണ് അധികൃതര്‍ക്ക് ലഭിച്ചത്. രക്ഷാ ദൗത്യവുമായി ഇറങ്ങിയ കപ്പലുകളാണ് കെ.ആര്‍.ഐ നംഗാല- 402 മുങ്ങിക്കപ്പലിന്‍റെ അവശിഷ്ടങ്ങള്‍ കണ്ടെത്തിയത്. കപ്പലിന്‍റെ പ്രധാന ഭാഗം പൊട്ടിയ നിലയിലാണ്. പരിസരങ്ങളില്‍നിന്ന് നാവികര്‍ ഉപയോഗിച്ചതെന്നു കരുതുന്ന വസ്തുക്കള്‍ കണ്ടെടുത്തിരുന്നു.
ഇതിനു പിന്നാലെയാണ് സോനാര്‍ സ്കാന്‍ വഴി കപ്പലിന്‍റെ ചിത്രങ്ങള്‍ പുറത്തുവന്നത്. സിംഗപ്പൂരില്‍ നിന്നും നല്‍കപ്പെട്ട രക്ഷാപ്രവര്‍ത്തനത്തിനുള്ള അന്തര്‍വാഹിനിയുടെ സഹായത്താലാണ് സംഭവം സ്ഥിരീകരിച്ചത്.
യു.എസ്, ആസ്ട്രേലിയ, സിംഗപൂര്‍, മലേഷ്യ, ഇന്ത്യ രാഷ്ട്രങ്ങളും രക്ഷാ ദൗത്യത്തില്‍ പങ്കാളികളായിരുന്നു.
ഇന്തൊനേഷ്യന്‍ പ്രസിഡന്റ് ജോകോ വിടോടോ ദുരന്തത്തില്‍ മരിച്ചവര്‍ക്ക് ആദരാജ്ഞലി അര്‍പ്പിക്കുകയും മരിച്ചവരുടെ ബന്ധുക്കളുടെ ദുഖത്തില്‍ പങ്കുചേരുന്നതായും പറഞ്ഞു.
Discussion about this post