മുംബൈ: ബോളിവുഡ് താരം സുശാന്ത് സിങ് രജ്പുത്തിന്റെ മരണവുമായി ബന്ധപ്പെട്ട് അന്വേഷണം ആരംഭിച്ച മയക്കുമരുന്ന് കേസില് സുശാന്തിന്റെ സുഹൃത്ത് സിദ്ധാര്ഥ് പിതാനി അറസ്റ്റില്. ഹൈദരാബാദില്നിന്ന് അറസ്റ്റ് ചെയ്ത സിദ്ധാര്ഥിനെ മുംബൈയില് എത്തിച്ചതായി ഒരു മുതിര്ന്ന ഉദ്യോഗസ്ഥന് പറഞ്ഞു.
ക്രിയേറ്റീവ് കണ്ടന്റ് മാനേജരാണ് സിദ്ധാര്ഥ്. ബന്ധ്രയിലെ അപാര്ട്ട്മെന്റില് സുശാന്തിനൊപ്പമായിരുന്നു സിദ്ധാര്ഥിന്റെ താമസം. സുശാന്തിനെ ജൂണ് 14ന് മരിച്ചനിലയില് ആദ്യം കണ്ടെത്തിയവരില് സിദ്ധാര്ഥും ഉള്പ്പെടും.
നാര്ക്കോട്ടിക്സ് കണ്ട്രോള് ബ്യൂറോ നടത്തിയ അന്വേഷണത്തില് മയക്കുമരുന്ന് കേസില് സിദ്ധാര്ഥ് ഉള്പ്പെട്ടതായി കണ്ടെത്തിയെന്നും തുടര്ന്നാണ് അറസ്റ്റെന്നും അധികൃതര് അറിയിച്ചു.
ഒരു പൊതു സുഹൃത്തിലൂടെയാണ് സുശാന്തിനെ പരിചയപ്പെടുന്നതെന്നും രണ്ടുപേരും തമ്മില് സുഹൃത്തുക്കളാകുകയായിരുന്നുവെന്നും സിദ്ധാര്ഥ് പറഞ്ഞു. നടി റിയ ചക്രബര്ത്തിയെ അറിയില്ലെന്നും വ്യക്തിപരമായ കാര്യങ്ങളെക്കുറിച്ച് തങ്ങള് ഇരുവരും സംസാരിച്ചിട്ടില്ലെന്നും സിദ്ധാര്ഥ് കൂട്ടിച്ചേര്ത്തു.
കൊറോണ വൈറസ് ലോക്ഡൗണ് സമയത്ത് താന് സുശാന്തിനൊപ്പമായിരുന്നു താമസം. സുശാന്ത് മരിക്കുന്നതിന് ഒരു രാത്രി മുമ്പ് രാത്രി ഒരു മണിയോടെയാണ് അവസാനമായി കണ്ടതെന്നും സിദ്ധാര്ഥ് പൊലീസിനോട് പറഞ്ഞു. ജൂണ് 14നാണ് മുംബൈയിലെ വസതിയില് സുശാന്തിനെ മരിച്ചനിലയില് കണ്ടെത്തുന്നത്.
Discussion about this post