ഹിമാലയസാനുക്കളില പാതയോരങ്ങളിലൂടെ ഒരു യാത്ര. മഞ്ഞിന്റെ കമ്പിളി പുതച്ച് കിടക്കുന്ന , വിഷ്ണു ഭഗവാന്റെ രണ്ടാം വൈകുണ്ഡമെന്ന് അറിയപ്പെടുന്ന ബദരിനാഥിലേക്ക് . കാലാവസ്ഥയിൽ മാറ്റം വരുന്നതിനനുസരിച്ച് ആചാരങ്ങളിലും മാറ്റങ്ങൾ വരുത്തുന്ന ക്ഷേത്രമാണിത് .ശൈത്യകാലത്ത് നട അടച്ചിടുമ്പോൾ ഭഗവാനെ പോലും കമ്പിളി പുതപ്പിക്കുന്ന ക്ഷേത്രം .
ഭാരതത്തിലെ ഏറ്റവും വലിയ ഹൈന്ദവ വിഷ്ണു തീർത്ഥടനകേന്ദ്രമാണ് ഉത്തരാഖണ്ഡിലെ ബദരിനാഥ് ക്ഷേത്രം. സമുദ്രനിരപ്പിൽ നിന്നും 10826 അടി ഉയരത്തിൽ സ്ഥിതി ചെയ്യുന്ന ഈ ക്ഷേത്രം വർഷത്തിൽ ആറ് മാസമാണ് തുറക്കുക. ഹിമാലയത്തിലെ കാലാവസ്ഥ കണക്കിലെടുത്താണ് ഇങ്ങനെ ഒരു ആറ് മാസകണക്ക്. ഏപ്രിൽ മാസാവസാനം മുതൽ നവംബർ മാസം ആദ്യം വരെയാണ് ക്ഷേത്രത്തിൽ സന്ദർശകരെ അനുവദിക്കുന്നത്. അക്ഷയ തൃതീയ നാളിലെ വൈകുന്നേരത്തെ പ്രത്യേക പൂജയ്ക്ക് ശേഷം അമ്പലം അടയ്ക്കുകയും വിജയദശമി നാളിൽ തുറക്കുകയും ചെയ്യുന്നു.
ബദരിനാഥ് ക്ഷേത്രത്തിലെ പ്രധാന പൂജാരി കണ്ണൂർ പയ്യന്നൂർ ചെറുതാഴം വടക്കെ ചന്ദ്രമന ഇല്ലത്തെ ഈശ്വരൻ നമ്പൂതിരിപ്പാടാണ് . ബദരിനാഥിൽ അദ്ദേഹം റാവൽജി എന്നാണ് അറിയപ്പെടുന്നത് . റാവൽ എന്നത് അദ്ദേഹത്തിന് സംസ്ഥാനം നൽകുന്ന പദവിയാണ് . ബദരീനാഥിലെ റാവൽജിക്ക് ഉത്തരാഖണ്ഡ് സർക്കാർ കാബിനറ്റ് പദവിയാണ് നൽകുന്നത് . 25 വർഷം ഈശ്വരപ്രസാദിന്റെ മുത്തച്ഛനായിരുന്നു ഇവിടുത്തെ പൂജാരി .
രാത്രി മൈനസ് 2 ഡിഗ്രിവരെ തണുപ്പാണ്. പകൽ 7 ഡിഗ്രിയും. 5.30നു അഭിഷേകത്തോടെ തുടങ്ങും.8.15വരെ പൂജകളാണ്. പൂർണ അലങ്കാരത്തോടെയാണു പൂജകൾ നടത്തുന്നത്. വൈകീട്ടു തുറന്നാൽ അത്താഴ പൂജയ്ക്കു ശേഷം രാത്രി 8ന് അടയ്ക്കും. സന്ധ്യയ്ക്കു പൂർണ അലങ്കാരത്തോടെ ദീപാരാധനയുണ്ട്. രാജ്യത്തിന്റെ അതിർത്തി തൊട്ടടുത്തായതിനാൽ പട്ടാളക്കാരും കൂടുതലായി വരാറുണ്ട് ബദരീനാഥനെ ദർശിക്കാൻ.
ഐതിഹ്യങ്ങളനുസരിച്ച് ദേവന്മാരാണ് ഇവിടെയുള്ള രൂപങ്ങൾ സ്ഥാപിച്ചതെന്നാണ് പറയപ്പെടുന്നത്. മറ്റുമതങ്ങളുടെ ആധിപത്യം വന്നതോടെ വിഗ്രഹം നദിയിലേക്ക് എറിയപ്പെടുകയും പിന്നീട് ആദി ശങ്കരാചാര്യർക്ക് അളകനന്ദ നദിയിൽ നിന്ന് ഇത് ലഭിക്കുകയും ചെയ്തുവെന്നും അദ്ദേഹമാണ് പ്രതിഷ്ഠ നടത്തിയതെന്നും പറയുന്നു. അദ്ദേഹം തന്നെയാണ് ഇവിടെ മലയാളികളായ പൂജാരിമാർ വേണമെന്ന് തീരുമാനിച്ചതും. ക്ഷേത്ര ഉത്ഭകാലം മുതൽ അത് തുടരുന്നു.
വിഷ്ണുവിന്റെ അവതാരമായ നർ-നാരായണൻ തപസ്സ് ചെയ്തത് ഇവിടെയാണ്. കുരുവില്ലാത്ത നെല്ലി മരക്കാടിന് സമീപമാണ് അദ്ദേഹം തപസ്സനുഷ്ഠിച്ചത്. നർ-നാരായണനെ മഴയിലും വെയിലും എൽക്കാതിരിക്കാൻ ലക്ഷ്മി ദേവി ഒരു മരമായി ആവരണം ചെയ്തു. ദേവിയുടെ പേരിന് ശേഷം അദ്ദേഹത്തിന്റെ പേരും കൂടി ചേർന്ന് ബദരി -നാഥ് എന്ന പേര് ഉണ്ടാവുകയും ചെയ്തു.
ഹിന്ദു മതവിശ്വാസികളുടെയിടയില് ഏറ്റവുമധികം പ്രചാരം ലഭിച്ച തീര്ഥയാത്രകളിലൊന്നാണ് ചാര് ദാം യാത്ര. ദൈവങ്ങള് വസിക്കുന്നുവെന്ന് വിശ്വസിക്കപ്പെടുന്ന നാല് സ്ഥലങ്ങളിലൂടെയുള്ള കഠിനമായ തീര്ഥാടനമാണിത്.
അതിൽ ഏറ്റവും പ്രധാനപ്പെട്ട തീർഥാടന കേന്ദ്രങ്ങളിലൊന്നാണ് ബദരിനാഥ് ക്ഷേത്രം. ബദ്രിനാഥ്, ദ്വാരക, പുരി, രാമേശ്വരം എന്നീ നാലു സ്ഥലങ്ങളാണ് ചാര് ദാമുകള് എന്നറിയപ്പെടുന്നത്.ഈ പുണ്യസ്ഥലങ്ങളിലൂടെ ജീവിതത്തില് ഒരിക്കലെങ്കിലും പോയിരിക്കണമെന്നാണ് ഓരോ ഹൈന്ദവ വിശ്വാസിയുടെയും ജീവിത ലക്ഷ്യം. ഹിമാലയത്തിലെ മഞ്ഞു മലകൾക്കിടയിൽ, പർവ്വതങ്ങൾക്കു നടുവിലായി സ്ഥിതി ചെയ്യുന്ന ഏക ചാർ ദാം തീർഥാടന കേന്ദ്രമെന്നും ബദ്രിനാഥ് അറിയപ്പെടുന്നു
ചുറ്റും മലകൾ കാവൽ നിൽക്കുന്ന ഈ ഹിമാലയ ഭൂമിയിൽ ഭഗവൽ സന്നിധിയിലേക്ക് ഒരു യാത്ര , ഒരു ജന്മത്തിന്റെ എല്ലാ പാപക്കറകളും കഴുകി മാറ്റുന്ന പുണ്യയാത്ര . ആരും കൊതിക്കുന്നതാണിത്.
https://www.youtube.com/watch?v=m06a9rFeZyM
Discussion about this post