നാഷ് വില്ലെ (യു.എസ്.): അമേരിക്കയിലെ ടൈറ്റാനിക് മ്യൂസിയത്തില് മഞ്ഞ് മല തകര്ന്ന് വീണ് മൂന്ന് സന്ദര്ശകര്ക്ക് പരിക്കേറ്റു. പരിക്ക് ഗുരുതരമാണോ എന്ന് വ്യക്തമല്ല. മ്യൂസിയത്തിലെ കേടുപാടുകള് പരിഹരിക്കാന് നാല് ആഴ്ചയെടുത്തേക്കുമെന്നാണ് റിപ്പോര്ട്ട്.
പരിക്കേറ്റവരെ ആശുപത്രിയിലെത്തിച്ചതായി മ്യൂസിയം ഉടമകളായ മേരി കെല്ലോഗ് ജോസ്ലിന്, ജോണ് ജോസ്ലിന് എന്നിവര് മ്യൂസിയത്തിന്റെ ഫേസ്ബുക്ക് പേജില് എഴുതി. എന്നാല്, പരിക്ക് എത്രത്തോളം ഗുരുതരമാണ് എന്ന് വ്യക്തമല്ല. ‘ഇന്ന് രാത്രി പിജിയോണ് ഫോര്ഗിലുള്ള ഞങ്ങളുടെ ടൈറ്റാനിക് മ്യൂസിയം അട്രാക്ഷനില് ഒരു അപകടം സംഭവിച്ചു. ഞങ്ങളുടെ മഞ്ഞുമല ഇടിഞ്ഞ് വീഴുകയും മൂന്ന് സന്ദര്ശകര്ക്ക് പരിക്കേല്ക്കുകയും ചെയ്തു. അവരെ ആശുപത്രിയിലെത്തിച്ചിട്ടുണ്ട്. പരിക്ക് എത്രത്തോളം ഗുരുതരമാണ് എന്ന് വ്യക്തമല്ല. പരിക്കേറ്റവക്കും വീട്ടുകാര്ക്കുമൊപ്പം നമ്മുടെ പ്രാര്ത്ഥനകളെപ്പോഴുമുണ്ട്. അവര് നമ്മുടെ ചിന്തകളിലുണ്ട്’ എന്നാണ് പോസ്റ്റില് പറയുന്നത്.
1912ല് അറ്റ്ലാന്റിക് സമുദ്രത്തില് മുങ്ങിയ ടൈറ്റാനിക് യാത്രാ കപ്പലിനെ അനുസ്മരിപ്പിക്കുന്ന മ്യൂസിയമാണിത്. 2010ലാണ് ടെന്നിസിയിലെ പിജിയോണ് ഫോര്ജില് മ്യൂസിയം ആരംഭിച്ചത്. ബ്രാന്സണിലും സമാനമായ ടൈറ്റാനിക് മ്യൂസിയം സ്ഥാപിച്ചിട്ടുണ്ട്.
മ്യൂസിയത്തില് ഐസ് കൊണ്ട് നിര്മിച്ച മതില് സന്ദര്ശകര്ക്ക് സ്പര്ശിക്കാന് അനുവാദമുണ്ടായിരുന്നു. സംഭവത്തെക്കുറിച്ച് പൊലീസും മ്യൂസിയം അധികൃതരും അന്വേഷണം ആരംഭിച്ചിട്ടുണ്ട്.
ആര്.എം.എസ് ടൈറ്റാനിക് എന്ന ബ്രിട്ടീഷ് യാത്രാ കപ്പലായ ടൈറ്റാനിക് 1912ലാണ് വടക്കന് അറ്റാലാന്റിക് സമുദ്രത്തില് മഞ്ഞുമലയില് ഇടിച്ച് മുങ്ങിയത്. അപകടത്തില് 1500ലേറെ പേര് മരിച്ചതായാണ് കരുതുന്നത്. യാത്രക്കാരും ജീവനക്കാരുമായി 2,224ഓളം പേര് കപ്പലിലുണ്ടായിരുന്നതായാണ് ഏകദേശ കണക്ക്.
ഒരിക്കലും മുങ്ങില്ലെന്ന് വിശേഷിപ്പിക്കപ്പെട്ട ടൈറ്റാനിക് ആദ്യ യാത്രയില് തന്നെ മുങ്ങുകയായിരുന്നു. കപ്പലിലെയും യാത്രക്കാരുടെയും 400ഓളം വസ്തുക്കള് മ്യൂസിയത്തില് പ്രദര്ശിപ്പിച്ചിട്ടുണ്ട്.
Discussion about this post