കാബൂള്‍ : താലിബാന്‍ അഫ്ഗാനിസ്ഥാന്‍ പിടിച്ചെടുത്തതിന് പിന്നാലെ താലിബാനെ നിരോധിച്ച് സാമൂഹ്യമാധ്യമമായ ഫേസ്ബുക്ക്. ഭീകര സംഘടനയെ ഫേസ്ബുക്കില്‍ നിരോധിക്കുകയും അവരെ പിന്തുണച്ചുകൊണ്ടുള്ള എല്ലാ കണ്ടന്റുകളും നീക്കം ചെയ്യുമെന്നും ഫേസ്ബുക്ക് ചൊവ്വാഴ്ച വ്യക്തമാക്കി. വര്‍ഷങ്ങളായി തങ്ങളുടെ സന്ദേശം കൈമാറാനായി താലിബാന്‍ ഉപയോഗിച്ചിരുന്നത് സാമൂഹ്യമാധ്യമങ്ങളെയാണ്. അതിനിടയിലാണ് ഫേസ്ബുക്ക് എതിരാളിരിക്കുന്നത്.
”താലിബാനെ തങ്ങള്‍ ഭീകരസംഘടനയായി മാത്രമേ പരിഗണിക്കൂ. അവരുമായി ബന്ധപ്പെട്ട അനുകൂല കണ്ടന്റുകളും ഗ്രൂപ്പുകളും നിക്കം ചെയ്യാനായി അഫ്ഗാന്‍ വിദഗ്ദ്ധരുടെ ഒരു ടീമിനെ വയ്ക്കും” കമ്പനി വ്യക്തമാക്കി.
അതേസമയം താലിബാന്റെ അപ്രതീക്ഷിത നീക്കം സാങ്കേതിക വിദ്യയുമായി ബന്ധപ്പെട്ട സ്ഥാപനങ്ങള്‍ക്ക് പുതിയ വെല്ലുവിളിയാണ്. താലിബാനെ അമേരിക്ക ഭീകരസംഘടനകളുടെ പട്ടികയിലാണ് പെടുത്തിയിരിക്കുന്നത്. അമേരിക്ക ആസ്ഥാനമാക്കിയാണ് ഫേസ്ബുക്ക് പ്രവര്‍ത്തിക്കുന്നതും. അമേരിക്കയ്ക്ക് ഭീകര സംഘടനകളോടുള്ള നയങ്ങളുടെ ഭാഗമായി സംഘടനയെ നിരോധിക്കുന്നു എന്നതാണ് ഫേസ്ബുക്കിന്റെ ഭാഷ്യം.
താലിബാനെ സ്തുതിച്ചും പിന്തുണച്ചും പ്രതിനിധീകരിച്ചുമെല്ലാമുള്ള അക്കൗണ്ടുകള്‍ നീക്കം ചെയ്യുമെന്നാണ് ഫേസ്ബുക്ക് വക്താവും പറഞ്ഞിരിക്കുന്നത്. ഇക്കാര്യം ചെയ്യുന്നതിനായും അത്തരം കണ്ടന്റുകള്‍ തിരിച്ചറിയുന്നതിനുമായും അഫ്ഗാനിലെ ഭാഷയായ പഷ്‌തോയും ദാരിയും അറിയാവുന്ന വിദഗ്ദ്ധരുടെ ഒരു ടീമിനെയും ഫേസ്ബുക്ക് തയ്യാറാക്കി. ഇക്കാര്യത്തില്‍ വിവിധ സര്‍ക്കാരുകളുടെ നിലപാടിനേക്കാള്‍ അന്താരാഷ്ട്ര സമൂഹത്തിനെ പിന്തുടരാനാണ് താല്‍പ്പര്യമെന്നും ഫേസ്ബുക്ക് നിലപാട് വ്യക്തമാക്കിയിട്ടുണ്ട്.
ഏറ്റവും പുതിയ സാമൂഹ്യ മാധ്യമ നെറ്റ്‌വര്‍ക്കും ഇന്‍സ്റ്റാഗ്രാമും വാട്‌സ്‌ആപ്പും എല്ലാറ്റിനും ഈ നയമാണ് ഉദ്ദേശിക്കുന്നത്. അതേസമയം ആശയവിനിമയത്തിന് താലിബാന്‍ ഉപയോഗിക്കുന്നത് വാട്‌സാപ്പാണ്. താലിബാന്‍ അഫ്ഗാനിസ്ഥാന്‍ തിരിച്ചുപിടിച്ചതോടെ ഇവരുടെ വക്താവിന് ആയിരക്കണക്കിന് ഫോളോവേഴ്‌സാണ് ഉണ്ടായത്. താലിബാന്‍ ട്വിറ്റര്‍ ഉപയോഗിക്കുന്നതുമായി ബന്ധപ്പെട്ട് ഉയര്‍ന്ന ചോദ്യത്തിന് അക്രമ സംഘടനയെയും വിദ്വേഷ കണ്ടന്റുകളും പ്രോത്സാഹിപ്പിക്കരുത് എന്നതാണ് തങ്ങളുടെ നയമെന്നായിരുന്നു കമ്പനിയുടെ മറുപടി.
