ഡല്‍ഹി: ഒഡിഷയിലെ കല്‍ക്കരിപ്പാടം കുമരമംഗലം ബിര്‍ളയുടെ ഹിന്‍ഡാല്‍കോ കമ്പനിക്ക് നല്‍കാന്‍ താന്‍ സമ്മര്‍ദം ചെലുത്തിയിട്ടില്ലെന്ന് മുന്‍ പ്രധാനമന്ത്രി മന്‍മോഹന്‍ സിംഗ്. ഇക്കാര്യത്തില്‍ ധൃതി കാണിക്കുയോ ബിര്‍ളക്ക് വാഗ്ദാനം നല്‍കുകയോ ചെയ്തിട്ടില്ലെന്നും സിംഗ് സി.ബി.ഐക്ക് നല്‍കിയ കുറിപ്പില്‍ പറഞ്ഞു.
ഒഡിഷയിലെ തലാബിറ കല്‍ക്കരിപ്പാടം തങ്ങള്‍ക്ക് കൈമാറണമെന്ന ഹിന്‍ഡാല്‍കോയുടെ അപേക്ഷ സര്‍ക്കാര്‍ ആദ്യം തള്ളിയിരുന്നു. എന്നാല്‍ 2005ല്‍ മന്‍മോഹന്‍ സിംഗ് കല്‍ക്കരി മന്ത്രാലയത്തിന്റെ ചുമതല വഹിക്കുമ്പോള്‍ ഹിന്‍ഡാല്‍കോ വീണ്ടും അപേക്ഷ നല്‍കി. ഇതുമായി ബന്ധപ്പെട്ട് ബിര്‍ളയും ഒഡിഷ മുഖ്യമന്ത്രി നവീന്‍ പട്‌നായികും നല്‍കിയ കത്തുകള്‍ സൂക്ഷ്മമായി പരിശോധിക്കാനാണ് കല്‍ക്കരി മന്ത്രാലയത്തോട് ആവശ്യപ്പെട്ടതെന്നും മന്‍മോഹന്‍ സിംഗ് സി.ബി.ഐയോട് വ്യക്തമാക്കി. ഹിന്‍ഡാല്‍കോയുടെ അപേക്ഷ തള്ളിയ മുന്‍ തീരുമാനം മാറ്റാനായിരുന്നു ബിര്‍ള കത്ത് നല്‍കിയത്. ഇതേ ആവശ്യമായിരുന്നു ഒഡിഷ മുഖ്യമന്ത്രിയും ഉന്നയിച്ചത്.
സ്‌ക്രീനിങ് കമ്മിറ്റി തലാബിറ കല്‍ക്കരിപ്പാടം പൊതുമേഖലാ സ്ഥാപനമായ നെയ്വേലി ലിഗ്‌നൈറ്റ് കോര്‍പറേഷന് നല്‍കാന്‍ തീരുമാനമെടുത്ത കാര്യം തനിക്കറിയാമായിരുന്നു. ഒഡിഷയില്‍ അലൂമിനിയം കമ്പനി സ്ഥാപിക്കുന്നുണ്ടെന്നും ഇതിന് കല്‍ക്കരിപ്പാടം അനിവാര്യമാണെന്നുമായിരുന്നു ബിര്‍ളയുടെ ആവശ്യം. എന്നാല്‍, സ്‌ക്രീനിങ് കമ്മിറ്റി തീരുമാനത്തില്‍ അപാകതയുണ്ടെങ്കില്‍ പുന$പരിശോധിക്കാന്‍ മാത്രമാണ് താന്‍ ആവശ്യപ്പെട്ടതെന്നും മന്‍മോഹന്‍ സിംഗ് അറിയിച്ചു.
Discussion about this post