കോട്ടയം: വിവാദമായ ഏറ്റുമാനൂര്‍ മഹാദേവ ക്ഷേത്രത്തിലെ തിരുവാഭരണ കേസില്‍ ക്ഷേത്രത്തില്‍ ഉപയോഗിച്ചിരുന്ന സ്വര്‍ണ രുദ്രാക്ഷമാല പൂര്‍ണമായും മോഷണം പോയെന്ന് പൊലീസിന്റെ സ്ഥിരീകരണം. ഇപ്പോള്‍ ഉപയോഗിക്കുന്ന 72 മുത്തുള‌ള മാല പകരം വച്ചതാണെന്ന് വിശദമായ പരിശോധനയ്‌ക്കൊടുവിലാണ് പൊലീസ് കണ്ടെത്തിയത്.
തിരുവിതാംകൂര്‍ ദേവസ്വം ബോര്‍ഡ് അധീനതയിലുള‌ള ക്ഷേത്രത്തിലെ മാലയിലെ ഒന്‍പത് മുത്തുകള്‍ മാത്രമാണ് നഷ്‌ടമായതെന്നായിരുന്നു തിരുവാഭരണം കമ്മീഷണര്‍ അജിത്‌കുമാര്‍ ദേവസ്വത്തിന് നല്‍കിയ റിപ്പോര്‍ട്ട്. എന്നാല്‍ വിവാദമുണ്ടായ ശേഷമാണ് 72 മുത്തുള‌ള ഈ മാല രജിസ്‌റ്ററില്‍ ചേര്‍ത്തതെന്ന് പൊലീസ് കണ്ടെത്തി. ജൂലായ് മാസത്തില്‍ പുതിയ മേല്‍ശാന്തി സ്ഥാനമേറ്റ സമയത്താണ് രുദ്രാക്ഷ മുത്തുള‌ള സ്വര്‍ണം കെട്ടിയ മാല കാണാതായെന്ന് ശ്രദ്ധയില്‍പെട്ടത്. തുടര്‍ന്ന് മുന്‍ മേല്‍ശാന്തിക്കെതിരെ ക്രിമിനില്‍ നടപടിയെടുക്കാനും ദേവസ്വം തീരുമാനിച്ചു. മാല നഷ്‌ടമായ വിവരം ബോര്‍ഡിനെ അറിയിക്കാത്ത ഉദ്യോഗസ്ഥര്‍ക്കെതിരെ നടപടിയുമെടുത്തു.
തിരുവാഭരണം കമ്മീഷണര്‍ എസ്.അജിത് കുമാര്‍, വൈക്കം ദേവസ്വം ഡെപ്യൂട്ടി കമ്മീഷണര്‍, ഏറ്റുമാനൂര്‍ ദേവസ്വം അസി.കമ്മീഷണര്‍, ക്ഷേത്രം അഡ്‌മിനിസ്‌ട്രേറ്റീവ് ഓഫീസര്‍ എന്നിവര്‍ക്കെതിരെയാണ് നടപടിയെടുത്തത്. അതേസമയം മുന്‍ മേല്‍ശാന്തി കേശവന്‍ സത്യേശ് താന്‍ ചുമതലയേറ്റെടുക്കുമ്പോഴും 72 മുത്തുള‌ള മാലയാണെന്ന് പൊലീസിന് മൊഴി നല്‍കി. വേണ്ടത്ര വലിപ്പമില്ലാത്തതുകൊണ്ട് വിഗ്രഹത്തില്‍ താന്‍ മാല ചാര്‍ത്തിയിരുന്നില്ലെന്നും കേശവന്‍ സത്യേശ് അറിയിച്ചു. തിരുവാഭരണത്തിലെ 23 ഗ്രാം സ്വര്‍ണമാല കാണാത്തതിന് മോഷണ കേസും പൊലീസ് എടുത്തിട്ടുണ്ട്.
Discussion about this post