ഡൽഹി: കൊവിഡ് വ്യാപനത്തിനിടയിലും സമ്പദ്ഘടന നേരിട്ട വെല്ലുവിളികളെ ഫലപ്രദമായി അതിജീവിക്കുകയും ഉറച്ച തീരുമാനങ്ങൾ കൈക്കൊള്ളുകയും ചെയ്ത മികച്ച നേതാവാണ് പ്രധാനമന്ത്രി നരേന്ദ്ര മോദിയെന്ന് ബിജെപി ദേശീയ അധ്യക്ഷൻ ജെ പി നഡ്ഡ. കൊവിഡ് വ്യാപനത്തിന് ശേഷമുള്ള ബിജെപിയുടെ ആദ്യ ദേശീയ എക്സിക്യൂട്ടീവ് യോഗത്തെ അഭിസംബോധന ചെയുകയായിരുന്നു അദ്ദേഹം. ലോക്ക്ഡൗൺ ഏർപ്പെടുത്താൻ തീരുമാനിച്ച് മുന്ന് മാസങ്ങൾക്കുള്ളിൽ രാജ്യത്താകമനാമുള്ള ജനങ്ങൾക്ക് അവശ്യ സൗകര്യങ്ങൾ എത്തിച്ച് കൊടുക്കുവാൻ സാധിച്ചുവെന്നും അദ്ദേഹം പറഞ്ഞു.
കൊവിഡ് വ്യാപനം നേരിടാൻ പ്രധാനമന്ത്രി രാജ്യത്തെ മുന്നിൽ നിന്ന് നയിച്ചു. കൊവിഡ് വ്യാപനം നേരിടാൻ പ്രധാനമന്ത്രി പ്രകടിപ്പിച്ച നേതൃപാടവത്തെ മാത്രമല്ല, ആ സാഹചര്യം മൂലം ഉടലെടുത്ത സാമ്പത്തിക പ്രതിസന്ധി എങ്ങനെ തരണം ചെയ്യാം എന്ന് അദ്ദേഹം ലോകത്തിന് കാണിച്ചു കൊടുത്തതിനെ കൂടിയാണ് ലോകാരോഗ്യ സംഘടന പ്രശംസിച്ചത്. നഡ്ഡ പറഞ്ഞു.
കഴിഞ്ഞ തെരഞ്ഞെടുപ്പുകളിൽ ബിജെപിക്ക് വോട്ട് വിഹിതം വർദ്ധിപ്പിക്കാനായെന്നും ജെ പി നഡ്ഡ പറഞ്ഞു. പ്രത്യേകിച്ച് ജമ്മു കശ്മീരിൽ ബിജെപി ചരിത്രപരമായ പ്രകടനമാണ് കാഴ്ചവെക്കുന്നത് എന്ന് അദ്ദേഹം പറഞ്ഞു. ആരോഗ്യ രംഗത്തും കാർഷിക മേഖലയിലും കേന്ദ്ര സർക്കാർ നടപ്പിലാക്കിയ പദ്ധതികളെയും ബിജെപി ദേശീയ അധ്യക്ഷൻ അഭിനന്ദിച്ചു.
