കണ്ണൂര്‍: സിഐടിയു ചുമട്ടു തൊഴിലാളികളുടെ സമരത്തെ തുടര്‍ന്ന് കണ്ണൂര്‍ മാതമംഗലത്ത് എസ് ആര്‍ അസോസിയേറ്റ്സ് എന്ന ഹാര്‍ഡ്‌വെയര്‍ കട പൂട്ടി. സാധനം വാങ്ങാനെത്തുന്നവരെ സമരക്കാര്‍ ഭീഷണിപ്പെടുത്തി തിരിച്ചയക്കുകയാണെന്നും കട തുടര്‍ന്നു കൊണ്ടുപോകാന്‍ കഴിയാത്ത സാഹചര്യമാണെന്നാണ് ഉടമ റബീഅ് പറയുന്നത്. ഒരു സ്വകാര്യ ചാനലാണ് ഈ വാര്‍ത്ത പുറത്തുവിട്ടത്.
70ലക്ഷം മുതല്‍മുടക്കി തുടങ്ങിയ സ്ഥാപനമാണ് മാസങ്ങള്‍ക്കകം പൂട്ടേണ്ടിവന്നതെന്നും ഉടമ പറയുന്നു. എന്നാല്‍ തൊഴില്‍ നിഷേധത്തിനെതിരെയാണ് സമരം നടത്തുന്നതെന്നും ആരെയും ഭീഷണിപ്പെടുത്തിയിട്ടില്ലെന്നുമാണ് സിഐടിയുവിന്റെ വിശദീകരണം. പഞ്ചായത്ത് ലൈസന്‍സ് ഇല്ലാത്തതിനാലാണ് കട പൂട്ടിയതെന്നും ലേബര്‍ കമ്മീഷണറോട് വിശദീകരണം ആവശ്യപ്പെട്ടിട്ടുണ്ടെന്നും വിഷയത്തില്‍ പരിഹാരം കാണുമെന്നും മന്ത്രി വി ശിവന്‍കുട്ടി പറഞ്ഞു.
കഴിഞ്ഞ ആഗസ്ത് രണ്ടിനാണ് എസ് ആര്‍ അസോസിയേറ്റ്സ് എന്ന ഹാര്‍ഡ്‌വെയര്‍ കട റബീഅ് തുടങ്ങിയത്. തൃശൂര്‍ ആസ്ഥാനമാക്കി സിമന്റ് വ്യാപാരം നടത്തുന്ന സ്റ്റാര്‍ എന്റര്‍പ്രൈസസ് ഉടമ കെഎ സബീലുമായുള്ള പാര്‍ട്നര്‍ഷിപ്പിലാണ് കച്ചവടം തുടങ്ങിയത്. കടയിലേയ്ക്ക് ആവശ്യമായ സാധനങ്ങള്‍ ഇറക്കാന്‍ തൊഴിലാളികള്‍ക്ക് ലേബര്‍ കാര്‍ഡും ഹൈക്കോടതി മുഖാന്തിരം വാങ്ങി. എന്നാല്‍ സിഐടിയുക്കാര്‍ ലോഡ് ഇറക്കുന്നത് തടയുകയും ഉടമയെ മര്‍ദിക്കുകയും ചെയ്തു.
ഭീഷണി വകവയ്ക്കാതെ സാധനം വാങ്ങിയ പ്രദേശത്തെ സിസിടിവി കട ഉടമ അഫ്സലിനെ നടുറോഡില്‍ വച്ച്‌ ചുമട്ട് തൊഴിലാളികള്‍ പൊതിരെ തല്ലി. മര്‍ദിച്ചതിന്റെ സിസിടിവി ദൃശ്യങ്ങള്‍ ഉണ്ടായിട്ടും അങ്ങനെയൊരു സംഭവം നടന്നിട്ടില്ലെന്നാണ് സിഐടിയു നേതാക്കള്‍ പറയുന്നത്. ചുമട്ട് തൊഴിലാളികളെ ചരക്കിറക്കാന്‍ അനുവദിച്ചില്ലെങ്കില്‍ സമരം അവസാനിപ്പിക്കില്ലെന്നും കട പൂട്ടുന്നത് തങ്ങളുടെ പരിഗണനയിലുള്ള വിഷയമല്ലെന്നാണ് സിഐടിയുവിന്റെ നിലപാട്.
Discussion about this post